മലയാള സിനിമാ ചരിത്രത്തിലെ തന്നെ ഏറ്റവും വലിയ വിജയചിത്രമായി മാറിയിരിക്കുകയാണ് ലോക ചാപ്റ്റർ 1 ചന്ദ്ര. കല്യാണി പ്രിയദർശൻ, നസ്‌ലിൻ, ചന്തു സലിംകുമാർ, അരുൺ കുര്യൻ, ടൊവിനോ, ദുൽഖർ തുടങ്ങി വൻ താരനിര ചിത്രത്തിൽ അണിനിരക്കുന്നുണ്ട്. ഇപ്പോഴിതാ ലോകയുടെ ഡബ്ബിങ്ങിന്റെ ബിടിഎസ് വിഡിയോ പുറത്തുവിട്ടിരിക്കുകയാണ് അണിയറപ്രവർത്തകർ.

നസ്‌ലിൻ, ചന്തു സലിംകുമാർ, അരുൺ കുര്യൻ, ടൊവിനോ, സയനോര തുടങ്ങിയവരുടെ ഡബ്ബിങ് വിഡിയോ ആണ് പുറത്തുവന്നിരിക്കുന്നത്. സംവിധായകൻ ഡൊമിനിക് അരുണിനെയും കാസ്റ്റിങ് ഡയറക്ടർ വിവേക് അനിരുദ്ധിനെയും വിഡിയോയിൽ കാണാം. അതേസമയം അധികം വൈകാതെ തന്നെ ലോക ഒടിടിയിലെത്തുമെന്നാണ് നിർമാതാക്കൾ അറിയിച്ചിരിക്കുന്നത്.

ജിയോ ഹോട്ട്സ്റ്റാറിലൂടെയാണ് ചിത്രം സ്ട്രീമിങ്ങിന് ഒരുങ്ങുന്നത്. സ്ട്രീമിങ് തീയതി ഹോട്ട്സ്റ്റാർ പുറത്തുവിട്ടിട്ടില്ലെങ്കിലും ദീപാവലിയോടനുബന്ധിച്ച് ചിത്രമെത്തുമെന്നാണ് പുറത്തുവരുന്ന വിവരം.

മലയാളം ഇൻഡസ്ട്രി ഹിറ്റ്, ഏറ്റവും കൂടുതൽ കളക്ഷൻ നേടിയ ഡബ്ബ് ചിത്രം, തെലുങ്കിൽ ഏറ്റവും ഉയർന്ന കളക്ഷൻ, ആഗോളതലത്തിൽ ഏറ്റവും കൂടുതൽ മാർക്കറ്റ് ഷെയർ, ബുക്ക് മൈ ഷോയിൽ ഏറ്റവും കൂടുതൽ ടിക്കറ്റുകൾ വിറ്റ റെക്കോർഡ്, ഏറ്റവും കൂടുതൽ ആളുകൾ തിയറ്ററിൽ എത്തിയ റെക്കോർഡ്, ആദ്യ 300 കോടി നേടിയ മലയാള ചിത്രം എന്നിങ്ങനെ നിരവധി റെക്കോർഡുകളാണ് ലോക സ്വന്തമാക്കിയിരിക്കുന്നത്.

നിമിഷ് രവിയാണ് ചിത്രത്തിന്റെ ഛായാ​ഗ്രഹണമൊരുക്കിയിരിക്കുന്നത്. ജേക്സ് ബിജോയ്‌യുടേതാണ് സം​ഗീതം. ചിത്രത്തിന്റെ രണ്ടാം ഭാ​ഗമായ ചാത്തന്റെയും പ്രഖ്യാപനം അടുത്തിടെ നടന്നിരുന്നു.

ദുൽഖർ സൽമാനും ടൊവിനോയുമാണ് ചാപ്റ്റർ 2വിന്റെ അനൗൺസ്മെന്റ് വിഡിയോയിലെത്തിയത്. ടൊവിനോയെ കേന്ദ്ര കഥാപാത്രമാക്കിയാണ് ലോക ചാപ്റ്റർ 2 ഒരുക്കുന്നത്. ഡബിൾ റോളിലാണ് ടൊവിനോ എത്തുകയെന്നാണ് വിവരം.