മമ്മൂട്ടി ചിത്രം 'ദി പ്രീസ്റ്റി'ൻറെ രണ്ടാമത്തെ ടീസർ പുറത്തെത്തി. നവാഗതനായ ജോഫിൻ ടി ചാക്കോ സംവിധാനം ചെയ്യുന്ന സസ്പെൻസ് ചിത്രത്തിലെ മമ്മൂട്ടി കഥാപാത്രം ഫാ. ബെനഡിക്ടിനെ പരിചയപ്പെടുത്തുന്നുണ്ട് ഇപ്പോൾ പുറത്തുവിട്ട ടീസറിൽ. ഒരു മിനിറ്റ് ദൈർഘ്യമുള്ളതാണ് വിഡിയോ. മാർച്ച് നാലിനാണ് സിനിമ റിലീസിനെത്തുന്നത്.

ഒരേ വീട്ടിൽ സംഭവിക്കുന്ന മൂന്ന് തുടർ ആത്മഹത്യകളിലെ നിഗൂഢത അന്വേഷിക്കുകയാണ് ഫാ. ബെനഡിക്ട്. മരണങ്ങളിലെ ദുരൂഹത മാറ്റാനാണ് അദൃശ്യമായതിനെ തേടിയുള്ള കുറ്റാന്വേഷണം. ഒടുവിൽ ഇരുട്ടിലേക്ക് വെളിച്ചം വീശാൻ ഫാ. ബെനഡിക്ടിന് കഴിയുമോ എന്ന ചോദ്യമാണ് പ്രേക്ഷകർക്ക മുന്നിലുള്ളത്. 

മമ്മൂട്ടിക്കൊപ്പം മഞ്ജു വാര്യർ ആദ്യമായി അഭിനയിക്കുന്ന ചിത്രമെന്ന പ്രത്യേകതയും പ്രീസ്റ്റിനുണ്ട്. നിഖില വിമൽ, സാനിയ ഇയ്യപ്പൻ, ശ്രീനാഥ് ഭാസി, ജഗദീഷ്, മധുപാൽ തുടങ്ങിയവരും അഭിനയിക്കുന്നു. ശ്യാം മേനോനും ദീപു പ്രദീപും ചേർന്ന് തിരക്കഥ ഒരുക്കിയിരിക്കുന്ന പ്രീസ്റ്റിന്റെ കഥ ജോഫിൻ തന്നെയാണ്. ആൻറോ ജോസഫ് ഫിലിം കമ്പനിയുടെയും ആർ ഡി ഇല്യൂമിനേഷൻസിൻറെയും ബാനറിൽ ആൻറോ ജോസഫും ബി ഉണ്ണികൃഷ്ണനും ചേർന്നാണ് ചിത്രം നിർമ്മിക്കുന്നത്.