സോഷ്യൽ മീഡിയയിൽ നിരവധി ആരാധകരുള്ള കുട്ടിത്താരമാണ് ആവർത്തന. ടിക്ടോക്കിൽ ഡബ്ല്മാഷ് ചെയ്താണ് ആവർത്ത കയ്യടി വാങ്ങാറുള്ളത്. കുട്ടിത്താരത്തിന്റെ വിഡിയോകളെല്ലാം സോഷ്യൽ മീഡിയയിൽ വൈറലാവാറുണ്ട്. ഇപ്പോൾ സൂപ്പർതാരം മമ്മൂട്ടിയെ അമ്പരപ്പിച്ചിരിക്കുകയാണ് ആവർത്തന. താരത്തിന്റെ സൂപ്പർഹിറ്റ് കഥാപാത്രമായ നന്ദ​ഗോപാൽ മാരാരായുള്ള കുട്ടിത്താരത്തിന്റെ പ്രകടനം കണ്ടതിന് പിന്നാലെയാണ് പ്രശംസയുമായി മമ്മൂട്ടി എത്തിയത്. 

വിഡിയോ വൈറൽ

നരസിംഹം സിനിമയിലെ നന്ദ​ഗോപാൽ മാരാരുടെ കോടതി രം​ഗമാണ് ഏഴു വയസുകാരിയായ ആവർത്തന ഡബ്സ്മാഷ് ചെയ്തത്. മമ്മൂട്ടിയുടെ കഠികട്ടി ഇം​ഗ്ലീഷ് ഡയലോ​ഗ് അനായാസമായാണ് അവതരിപ്പിച്ചത്. ഇന്‍സ്റ്റഗ്രാമിലൂടെ പങ്കുവെച്ചതോടെ വിഡിയോ വൈറലായി. അതോടെയാണ് ആവർത്തനയെ തേടി മമ്മൂട്ടിയുടെ ശബ്ദസന്ദേശം എത്തിയത്. 

നല്ല നടിയായി മാറണമെന്ന് മമ്മൂട്ടി

'ആവർത്തന വളരെ നന്നായിട്ടുണ്ട്. വീണ്ടും വീണ്ടും ആവർത്തിക്കാം. സ്വന്തമായും നല്ല അഭിനയം കാഴ്ചവെക്കണം. നല്ല ഒരു നടിയായി മാറട്ടെ. അതിനുള്ളിൽ പഠിത്തമൊക്കെ പാസ്സായി അഭിനയം അല്ലാതെ മറ്റൊരു തൊഴിൽ കണ്ടെത്തുക. അതിനു ശേഷം അഭിനയം തൊഴിലാക്കുക', മമ്മൂട്ടി പറഞ്ഞു. ആവർത്തന തന്നെയാണ് സന്തോഷവാർത്ത സോഷ്യൽ മീഡിയയിൽ പങ്കുവച്ചത്. മമ്മൂട്ടിയുടെ നല്ല വാക്കുകൾക്ക് നന്ദി പറഞ്ഞുകൊണ്ട് ആവർത്തന മറുപടിയും നൽകി. 

പാലക്കാട് സ്വദേശിനിയായ ആവര്‍ത്തന ടിക് ടോക്കിലൂടെയാണ് വൈറലാവുന്നത്. കെ.കെ ശൈലജയുടെ നിയമസഭയിലെ തീപ്പൊരി പ്രസംഗം ഡബ്സ്മാഷ് ചെയ്താണ് ഈ കു‍ഞ്ഞ് മിടുക്കി വൈറലായത്. ഇപ്പോൾ സിനിമയിലേക്കും ചുവടുവച്ചിരിക്കുകയാണ് ഈ കുട്ടിത്താരം.