താരസംഘടനയായ 'അമ്മ'യിലെ ആഭ്യന്തര തർക്കങ്ങളിൽ‍ തന്റെ നിലപാട് വ്യക്തമാക്കി നടൻ മമ്മൂട്ടി. പത്മഭൂഷൺ ഏറ്റുവാങ്ങിയ ശേഷം ഡൽഹിയിൽ വച്ച് മാധ്യമങ്ങളോട് പ്രതികരിക്കുകയായിരുന്നു മമ്മൂട്ടി. സംഘടനയിലെ പ്രശ്നങ്ങൾ വലിയ കാര്യങ്ങളല്ലെന്നും എല്ലാം കാത്തിരുന്ന് കാണാമെന്നും മമ്മൂട്ടി പറഞ്ഞു.

സിനിമയിലെ അഞ്ച് പതിറ്റാണ്ടു കാലത്തെ സമഗ്ര സംഭാവനകൾ പരിഗണിച്ചാണ് മമ്മൂട്ടിക്ക് പത്മഭൂഷൺ പുരസ്കാരം ലഭിച്ചത്. പുരസ്കാരം സ്വീകരിച്ചതിൽ താൻ അതീവ സന്തുഷ്ടനാണെന്നും ഇരട്ടി സന്തോഷം ഉണ്ടെന്നും മമ്മൂട്ടി മാധ്യമങ്ങളോട് പങ്കുവെച്ചു.

"നടക്കട്ടെ, തീരുമാനം ആയിക്കോളും, കുഴപ്പമില്ല. എല്ലാം കാത്തിരുന്നല്ലേ കാണാൻ പറ്റുള്ളൂ ? അടുത്ത നിമിഷം നമ്മുടെ കയ്യിൽ അല്ലല്ലോ. എല്ലാ പ്രശ്നങ്ങളും ശരിയാവും. ശരിയാവണമല്ലോ, ശരിയായിക്കോളും. എല്ലാം ചെറിയ ചെറിയ കാര്യങ്ങളല്ലേ ?."- മമ്മൂട്ടി പറഞ്ഞു.

അതേസമയം പത്മഭൂഷൺ ഏറ്റുവാങ്ങാൻ കുടുംബസമേതമാണ് മമ്മൂട്ടിയെത്തിയത്. മമ്മൂട്ടിയെ കണ്ടതിന്റെ സന്തോഷം പ്രധാനമന്ത്രി നരേന്ദ്ര മോദിയും പങ്കുവച്ചിരുന്നു. അതേസമയം 'അമ്മ' ജനറൽ ബോഡിയിലുണ്ടായ തർക്കത്തെ തുടർന്ന് ഭരണസമിതി കഴിഞ്ഞ ദിവസം രാജിവച്ചിരുന്നു. 'അമ്മ' പ്രസിഡന്റ് ശ്വേത മേനോൻ, ജനറൽ സെക്രട്ടറി കുക്കു പരമേശ്വരൻ എന്നിവരുൾപ്പെടുന്ന ഭരണസമിതിയാണ് രാജി വച്ചത്.