ബി ഉണ്ണികൃഷ്ണൻ സംവിധാനം ചെയ്ത ആറാട്ടിലെ മോഹൻലാലിന്റെ പ്രകടനം സൂക്ഷ്മമായി നിരീക്ഷിച്ച് ആരു ശ്രദ്ധിക്കാതെപോയ ബ്രില്യൻസ് കണ്ടെത്തിയിരിക്കുകായാണ് ആരാധകർ. കാമറയ്ക്ക് മുന്നിൽ താരം വളരെ അനായാസമായി അഭിനയിക്കുമ്പോഴും അതിനിടയിൽ സംഭവിച്ച കാര്യങ്ങൾ സൂക്ഷ്മമായി നിരീക്ഷിച്ചാണ് ആരാധകർ താരത്തെ പ്രശംസിച്ച് എത്തിയിരിക്കുന്നത്. 

ജീപ്പിൽ പാഞ്ഞെത്തി കൈ ബോണറ്റിൽ ഇടിക്കുമ്പോൾ മോഹൻലാൽ ധരിച്ചിരുന്ന വള രണ്ടായി പൊട്ടിപ്പോകുന്നത് കാണാം. കൈ നന്നായി വേദനിച്ചെങ്കിലും മുഖത്തിൽ ഭാവമാറ്റമൊന്നുമില്ലാതെ ടേക്ക് തടസ്സപ്പെടുത്താതെ അഭിനയിക്കുകയായിരുന്നു താരം. വളരെ സ്വാഭാവികമായി തന്നെ പൊട്ടിയ വള കൈയ്യിലാക്കി സീൻ പൂർത്തിയാക്കുകയും ചെയ്തു. സിദ്ദിഖും മോഹൻലാലും തമ്മിലുള്ള സീനിൽ ആണ് ഈ സംഭവം. 

ചിത്രത്തിൽ നെയ്യാറ്റിൻകര ഗോപൻ എന്ന കഥാപാത്രമായാണ് മോഹൻലാൽ എത്തുന്നത്. സ്വദേശമായ നെയ്യാറ്റിൻകരയിൽ നിന്നും ഒരു പ്രത്യേക ലക്ഷ്യത്തോടെ ഗോപൻ പാലക്കാട്ടെ ഒരു ഗ്രാമത്തിൽ എത്തുന്നതും തുടർ സംഭവങ്ങളുമാണ് ചിത്രത്തിൻറെ പ്ലോട്ട്. ഉദയകൃഷ്ണയാണ് ചിത്രത്തിന് തിരക്കഥ ഒരുക്കിയത്. ശ്രദ്ധ ശ്രീനാഥ് ആണ് നായിക.