എംപുരാനിലെ കഥാപാത്രങ്ങളെക്കുറിച്ചുള്ള വിവരങ്ങളെല്ലാം നാളെ മുതൽ പ്രേക്ഷകരിലേക്കെത്തുമെന്ന് സംവിധായകൻ‌ പൃഥ്വിരാജ് ഇന്ന് അറിയിച്ചിരുന്നു. ഇതിനെ പിന്നാലെ ചിത്രത്തിലെ അഭിനേതാക്കളെ കുറിച്ചുള്ള ചർച്ചകളും സോഷ്യൽ മീ‍ഡിയയിൽ തുടങ്ങി. നിരവധി വിദേശ അഭിനേതാക്കളും സിനിമയുടെ ഭാ​ഗമാകുന്നുണ്ടെന്നാണ് റിപ്പോർട്ടുകൾ.

ഇപ്പോഴിതാ ഹോളിവുഡ് സിനിമകളിലൂടെ ശ്രദ്ധേയനായ റിക്ക് യൂണിന്റെ പേരും സമൂഹ മാധ്യമങ്ങളിൽ ഉയർന്നു കേൾക്കുകയാണ്. റിക്കിന്റെ വിക്കിപീഡിയ പേജിൽ കാണുന്ന സിനിമകളുടെ ലിസ്റ്റിൽ എംപുരാന്റെ പേരും ചേർത്തിരുന്നു. എന്നാൽ സോഷ്യൽ മീഡിയയിൽ ചർച്ചകൾ വൈറലായതോടെ എംപുരാന്റെ പേര് ഒഴിവാക്കുകയും ചെയ്തിട്ടുണ്ട്. കില്ലിങ് ഈവ്, വാരിയർ നൺ എന്നീ സീരിസുകളിൽ അഭിനയിച്ച ആൻഡ്രിയ ടിവദറും ചിത്രത്തിൽ പ്രധാന വേഷത്തിലെത്തുന്നുണ്ട്.

ആൻഡ്രിയ ഇക്കാര്യം സ്ഥിരീകരിച്ചിട്ടുമുണ്ട്. എംപുരാന്റെ ഭാ​ഗമാകാൻ കഴിഞ്ഞതിൽ തനിക്ക് സന്തോഷമുണ്ടെന്നും ആൻഡ്രിയ എംപുരാന്റെ പോസ്റ്റർ പങ്കുവച്ച് കുറിച്ചിരുന്നു. ലോകപ്രശ്‌സതമായ ക്രിമിനൽ ഗ്യാങായ യാക്കൂസ ഗ്യാങ് ആയിരിക്കും അബ്‌റാം ഖുറേഷിയുടെ എതിരാളിയായി എത്തുകയെന്നും സോഷ്യൽ മീഡിയയിൽ ചിലർ പറയുന്നുണ്ട്. തീ തുപ്പുന്ന ചുവന്ന ഡ്രാഗൺ യാക്കൂസ ഗ്യാങിന്റെ ഉയർന്ന തലത്തിലുള്ളവർ ധരിക്കുന്ന ചിഹ്നമാണ്.

'100 കോടി ഷെയർ നേടിയ ഒരു സിനിമയുടെ പേര് പറയട്ടെ; കളക്ഷൻ വിവരങ്ങൾ ഓരോ മാസവും യൂട്യൂബ് ചാനലിലൂടെ പുറത്തുവിടും'

ഈ ഗ്യാങ്ങിന്റെ തലവനായാകും റിക്ക് എത്തുക എന്നും സോഷ്യൽ മീ‍ഡിയയിൽ ആളുകൾ കുറിച്ചിട്ടുണ്ട്.കൊറിയൻ പശ്ചാത്തലമുള്ള ഹോളിവുഡ് നടനാണ് റിക്ക് യൂൺ. ഫാസ്റ്റ് ആൻഡ് ഫ്യൂരിയസ്, ഡൈ അനദർ ഡേ, നിൻജ അസാസിൻ, ഒളിമ്പസ് ഹാസ് ഫോളൻ തുടങ്ങിയ സിനിമകളിൽ റിക്ക് ശ്രദ്ധേയമായ കഥാപാത്രങ്ങളെ അവതരിപ്പിച്ചിട്ടുണ്ട്. മാർച്ച് 27 നാണ് എംപുരാൻ തിയറ്ററുകളിലെത്തുക.