ലൂസിഫറിന്റെ രണ്ടാം ഭാ​ഗം വരുന്നുവെന്ന് കേട്ടപ്പോൾ തന്നെ മലയാള സിനിമാ പ്രേക്ഷകർ ആവേശത്തിലാണ്. മോഹൻലാല്‍ വീണ്ടും പൃഥ്വിരാജിന്റെ സംവിധാനത്തിലുള്ള ചിത്രത്തില്‍ എത്തുമ്പോള്‍ പ്രേക്ഷകര്‍ക്കും പ്രതീക്ഷ ഏറെയാണ്. ചിത്രത്തിന്റെ ഷൂട്ടിങ് പൂര്‍ത്തിയായെന്ന് അണിയറപ്രവർത്തകർ അറിയിച്ചിരുന്നു. മലയാളത്തിനു പുറമേ തെലുങ്കിലും ഹിന്ദിയിലും കന്നഡയിലും തമിഴിലും എമ്പുരാൻ പ്രദര്‍ശനത്തിന് എത്തും.

ഇപ്പോഴിതാ എമ്പുരാനെക്കുറിച്ച് മോഹൻലാൽ പങ്കുവച്ചിരിക്കുന്ന ഒരു കുറിപ്പാണ് സോഷ്യൽ മീഡിയയിൽ ശ്രദ്ധേയമാകുന്നത്. "എമ്പുരാൻ പൂർത്തിയായി. യുകെ, യുഎസ്എ, യുഎഇ എന്നിവയുൾപ്പെടെ 8 സംസ്ഥാനങ്ങളിലൂടെയും 4 രാജ്യങ്ങളിലൂടെയും 14 മാസത്തെ യാത്രയായിരുന്നു എമ്പുരാൻ. പൃഥ്വിരാജ് സുകുമാരൻ്റെ ക്രിയേറ്റിവിറ്റി സിനിമയുടെ ഓരോ ഫ്രെയിമിലും കാണാനാകും. ഈ സിനിമയെ രൂപപ്പെടുത്തിയ മുരളി ഗോപിയുടെ മികച്ച കഥ പറച്ചിലിന് വളരെ നന്ദി.

ഈ പ്രൊജക്റ്റിലുള്ള അചഞ്ചലമായ വിശ്വാസത്തിന് ആൻ്റണി പെരുമ്പാവൂരിനും വിലമതിക്കാനാകാത്ത പിന്തുണ നൽകിയ സുഭാസ്‌കരനും ലൈക്ക പ്രൊഡക്ഷൻസിനും ഹൃദയം നിറഞ്ഞ നന്ദി. ഈ കഥയ്ക്ക് ജീവൻ നൽകുന്ന അർപ്പണബോധമുള്ള അഭിനേതാക്കളും അണിയറപ്രവർത്തകരും ഇല്ലാതെ ഇതൊന്നും സാധ്യമാകുമായിരുന്നില്ല. ഒരു നടനെന്ന നിലയിൽ എമ്പുരാൻ എനിക്ക് വളരെ സ്പെഷ്യലാണ്.

'ഞാന്‍ വിവാഹിതയാവുകയാണ്, ഗോവയില്‍ വെച്ചാണ് ചടങ്ങ്'; സ്ഥിരീകരിച്ച് കീര്‍ത്തി സുരേഷ്

എനിക്കിത് വളരെ അമൂല്യമാണ്. ഞങ്ങളുടെ പ്രേക്ഷകർക്ക്, നിങ്ങളുടെ സ്നേഹവും പിന്തുണയും ഞങ്ങളെ ഓരോ നിമിഷവും പ്രചോദിപ്പിക്കുന്നു. കാത്തിരിക്കൂ, ഇനിയും ഒരുപാട് കാര്യങ്ങൾ വരാനുണ്ട്! "- എന്നാണ് മോഹൻലാൽ കുറിച്ചിരിക്കുന്നത്. ആദ്യ ഭാഗത്തിൽ മോഹൻലാൽ അവതരിപ്പിച്ച സ്റ്റീഫൻ നെടുമ്പള്ളി എന്ന കഥാപാത്രത്തിന് ഏറെ ആരാധകരാണുള്ളത്. അടുത്ത വർഷം മാര്‍ച്ച് 27 ന് ചിത്രം തിയറ്ററുകളിലെത്തും.