മലയാള സിനിമയിലെ യുവതാരനിരയെക്കുറിച്ച് തമിഴ് സംവിധായകന്‍ രാജ കറുപ്പസ്വാമി. മൊതരാത്രി എന്ന ചിത്രത്തിലൂടെ കയ്യടി നേടിയ സംവിധായകനാണ് രാജ കറുപ്പസ്വാമി. ക്യു സ്റ്റുഡിയോയ്ക്ക് നല്‍കിയ അഭിമുഖത്തിലായിരുന്നു അദ്ദേഹത്തിന്റെ പ്രതികരണം. മൊതരാത്രി, ഡൊറത്തി എന്നീ സിനിമകളിലൂടെ ഋഷികാന്ത്, ഡൊറത്തിയിലൂടെ സനന്ത് എന്നിവര്‍ താരങ്ങളായതിനെക്കുറിച്ച് സംസാരിക്കുകയായിരുന്നു രാജ.

ഋഷികാന്തിന്റേയും സനന്തിന്റേയും വരവ് തമിഴ് സിനിമയില്‍ വലിയ സാധ്യതകള്‍ക്ക് ഇടവരുത്തുമെന്നാണ് രാജ പറഞ്ഞത്. അതേസമയം മലയാളത്തില്‍ എല്ലാ ഏജ് ഗ്രൂപ്പിലുമുള്ള നായകന്മാരുണ്ടെന്നും അദ്ദേഹം പറഞ്ഞു. മലയാളത്തിലെ യുവതാരങ്ങളുടെ പേരെടുത്ത് പറഞ്ഞായിരുന്നു രാജയുടെ പ്രശംസ.

''തമിഴ് സിനിമ ഋഷികാന്തിനേയും സനന്തിനേയും അര്‍ഹിക്കുന്നുണ്ട്. വേറേയും അഭിനേതാക്കളുണ്ട്. ഈ രണ്ട് പേരേയും ലഭിച്ചത് കാരണം തമിഴ് സിനിമയില്‍ ധാരാളം കഥകള്‍ അതിന് പറ്റിയ നടന്മാരില്ലാതെ കിടക്കുകയായിരുന്നു. മലയാളം സിനിമയിലേക്ക് നോക്കിയാല്‍ ഇവിടെ എല്ല തലത്തിലും പത്ത് പേരെ വച്ചിട്ടുണ്ട്. എല്ലാത്തിനുമുള്ള ഹീറോസുണ്ട്. ഇവിടെ നസ്‌ലെന്‍ ഉണ്ട്, സന്ദീപ് ഉണ്ട്, ഹാഷിര്‍ ഉണ്ട്, സംഗീത് പ്രതാപുണ്ട്. പക്ഷെ അവിടെ 20-30 ന് ഇടയിലുള്ള നടന്മാര്‍ കുറവാണ്. കെന്നും അഭിഷന്‍ ജീവന്തുമാണുള്ളത് ആ ഏജ് ക്യാറ്റഗറിയിലുള്ളത്. ഇപ്പോള്‍ ഋഷി അണ്ണനും സനന്തും വന്നതോടെ അവര്‍ക്കായുള്ള കഥകള്‍ വരും. ഈ വര്‍ഷത്തെ ഏറ്റവും മികച്ചതായി ഞാന്‍ കാണുന്നത് ഇവര്‍ രണ്ടു പേരേയും ആഘോഷിക്കുന്നതാണ്'' എന്നാണ് അദ്ദേഹം പറഞ്ഞത്.

മൊതരാത്രിയുടെ സംവിധായകനാണ് രാജ കറുപ്പസ്വാമി. ചിത്രത്തിലൊരു പ്രധാന വേഷവും രാജ അവതരിപ്പിച്ചിട്ടുണ്ട്. നടനായും സംവിധായകനായും രാജ കയ്യടി നേടിയിരുന്നു. ഋഷികാന്തും മലയാളി നടി അനിഷ്മ അനില്‍കുമാറുമാണ് ചിത്രത്തിലെ പ്രധാന വേഷങ്ങളിലെത്തിയത്.