കഴിഞ്ഞ ഓ​ഗസ്റ്റിലായിരുന്നു നടൻ നാ​ഗ ചൈതന്യയും നടി ശോഭിത ധൂലിപാലയും തമ്മിലുള്ള വിവാഹനിശ്ചയം. ചിത്രങ്ങൾ പങ്കുവച്ച് താരങ്ങൾ തന്നെയായിരുന്നു ഇക്കാര്യം ആരാധകരെ അറിയിച്ചത്. വിവാഹനിശ്ചയം കഴിഞ്ഞതിന് പിന്നാലെ താരങ്ങൾക്കെതിരെ സൈബർ ആ​ക്രമണവും നടന്നിരുന്നു. ഇപ്പോഴിതാ ശോഭിതയ്ക്കൊപ്പമുള്ള ഫോട്ടോ പങ്കുവച്ചിരിക്കുകയാണ് നാ​ഗ ചൈതന്യ.

കറുപ്പ് നിറത്തിലെ വസ്ത്രം ധരിച്ച് ലിഫ്റ്റിനുള്ളിൽ നിന്നെടുത്ത സെൽഫി ചിത്രമാണ് താരം പങ്കുവച്ചിരിക്കുന്നത്. ടീ ഷർട്ടിന് മുകളിൽ ബ്ലാക് ലെതർ ജാക്കറ്റാണ് നാ​ഗ ചൈതന്യ ധരിച്ചിരുന്നത്. ബാഗി ജീൻസും സ്ലീവ്‌ലെസ് ബ്ലാക്ക് ടോപ്പുമാണ് ശോഭിത ധരിച്ചത്. 'എല്ലായിടത്തും എല്ലാം ഒരേസമയം' എന്നാണ് ഫോട്ടോയ്ക്ക് ഒപ്പം നാ​ഗ ചൈതന്യ ക്യാപ്ഷനായി കുറിച്ചിരിക്കുന്നത്.

മമ്മൂട്ടിയുടെ നായിക, നടി രമ്യ പാണ്ഡ്യൻ വിവാഹിതയാകുന്നു

ഫോട്ടോ ഷെയർ ചെയ്തതിന് ഒപ്പം തന്നെ കമന്റ് ബോക്സും നടൻ ഓഫ് ചെയ്തിട്ടുണ്ട്. പിന്നാലെ ഈ വർഷം അവസാനത്തോടെയോ അടുത്ത വർഷം മാർച്ചിലോ ആകും താരങ്ങളുടെ വിവാഹം എന്നാണ് തെലുങ്ക് മാധ്യമങ്ങൾ റിപ്പോർട്ട് ചെയ്യുന്നത്. രാജസ്ഥാനിൽ വച്ചാകും വിവാഹമെന്നും വിവരമുണ്ട്. ഹൈദരാബാദിൽ വച്ചാകും റിസപ്ഷൻ.