കഴിഞ്ഞ വർഷം ഡിസംബറിലാണ് നടൻ നാ​ഗ ചൈതന്യയും നടി ശോഭി​ത ധൂലിപാലയും തമ്മിൽ വിവാഹിതരായത്. ഏറെ നാളത്തെ പ്രണയത്തിന് ശേഷമായിരുന്നു ഇരുവരും തമ്മിൽ വിവാഹിതരായത്. വിവാഹ വാർഷിക ദിനത്തിൽ ശോഭിത സോഷ്യൽ മീഡിയയിൽ പങ്കുവച്ച കുറിപ്പ് ഏറെ ശ്രദ്ധ നേടിയിരുന്നു.

ഇതിന് പിന്നാലെ ഇരുവരുടെയും ജീവിതത്തിലേക്ക് ഒരു കുഞ്ഞ് അതിഥി എത്തുന്നുവെന്ന തരത്തിൽ അഭ്യൂഹങ്ങൾ പരക്കുകയും ചെയ്തു. ഇപ്പോഴിതാ ഇത്തരം അഭ്യൂഹങ്ങൾക്ക് മറുപടിയുമായെത്തിയിരിക്കുകയാണ് നാ​ഗ ചൈതന്യയുടെ അച്ഛനും നടനുമായ നാഗാർജുന. അച്ഛനിൽ നിന്ന് മുത്തച്ഛനായി പ്രമോഷൻ കിട്ടിയോ എന്നായിരുന്നു അവതാരകൻ നാഗാർജുനയോട് ചോദിച്ചത്.

ചോദ്യങ്ങൾക്ക് മറുപടി നൽകാതെ നടൻ ചിരിച്ചു തള്ളിയെങ്കിലും വീണ്ടും അവതാരകൻ ചോദ്യം ആവർത്തിച്ചു. ചോദ്യത്തെ സ്ഥിരീകരിക്കുകയോ നിഷേധിക്കുകയോ ചെയ്യാതെ 'ശരിയായ സമയം വരുമ്പോൾ ഞാൻ നിങ്ങളെ അറിയിക്കാം,' എന്നാണ് നടൻ മറുപടി നൽകിയത്.

2024 ഡിസംബർ 4 ന് അന്നപൂർണ സ്റ്റുഡിയോയിൽ വെച്ച് അടുത്ത സുഹൃത്തുക്കളുടെയും ബന്ധുക്കളുടെയും സാന്നിധ്യത്തിലായിരുന്നു ശോഭിതയുടെയും നാ​ഗ ചൈതന്യയുടെയും വിവാഹം. 2017 ലാണ് നടി സാമന്തയുമായുള്ള നാ​ഗ ചൈതന്യയുടെ വിവാഹം. 2021 ൽ ഇരുവരും വേർപിരിയുകയും ചെയ്തു.