​ഗീതു മോഹൻദാസ് സംവിധാനം ചെയ്യുന്ന കന്നഡ ചിത്രമാണ് 'ടോക്സിക്'. ചിത്രത്തിന്റെ ട്രെയ്‌ലർ ലോഞ്ച് കഴിഞ്ഞ ദിവസം ബാം​ഗ്ലൂരിൽ വച്ച് നടന്നു. പരിപാടിയിൽ ​ഗീതു മോഹൻദാസുമായുള്ള തന്റെ ബന്ധത്തെക്കുറിച്ച് നടി നയൻതാര പങ്കുവച്ചിരുന്നു. "ഏകദേശം 20 വർഷങ്ങൾക്ക് മുൻപ് ഞങ്ങൾ ഒന്നിച്ചഭിനയിച്ചിട്ടുണ്ട്.

അത് വ്യത്യസ്തമായ ഒരു ഗീതുവായിരുന്നു. ഈ സിനിമയ്ക്കായി എന്നെ വിളിച്ചപ്പോൾ, ഒരുപാട് താരങ്ങൾ ചിത്രത്തിലുണ്ടായിരുന്നതിനാൽ എനിക്ക് തുടക്കത്തിൽ അല്പം സംശയമുണ്ടായിരുന്നു. വലിയ താരനിരയുള്ള സിനിമകൾ തിരഞ്ഞെടുക്കുമ്പോൾ ഞാൻ കുറച്ച് ജാഗ്രത കാണിക്കാറുണ്ട്.

ആദ്യം ഞാൻ പിന്മാറാൻ തുനിഞ്ഞെങ്കിലും അവസാനം ഞാൻ ഗീതുവിനോട് നേരിട്ടുവന്ന് കഥ എന്നോട് പറയാൻ ആവശ്യപ്പെട്ടു. കഥ കേട്ട ആ നിമിഷം മുതൽ, ഇത്രയും കാലം നമ്മൾ കാണാതെ പോയൊരു മികച്ച സംവിധായികയാണ് ഗീതുവെന്ന് എനിക്ക് തോന്നി. സിനിമ തിയറ്ററുകളിൽ എത്തുമ്പോൾ പ്രേക്ഷകർ അത്ഭുതപ്പെടും.

സെറ്റിലെ ഓരോ നടീനടന്മാരുടെയും വിഷമഘട്ടങ്ങളിൽ കൂടെനിന്ന് അവരെ കരുതലോടെ നയിക്കാൻ ഗീതുവിന് സാധിച്ചു".- നയൻതാര പറഞ്ഞു. 2005 ൽ പുറത്തിറങ്ങിയ 'രാപ്പകൽ' എന്ന സിനിമയിലാണ് നയൻതാരയും ​ഗീതു മോഹൻദാസും ഒന്നിച്ച് അഭിനയിച്ചത്.

കമൽ സം‌വിധാനം ചെയ്ത ചിത്രത്തിൽ മമ്മൂട്ടിയും ശാരദയും പ്രധാന വേഷത്തിലെത്തിയിരുന്നു. അതേസമയം യഷ് ആണ് 'ടോക്സിക്കിൽ' നായകനായെത്തുന്നത്. ഓഗസ്റ്റ് 26 ന് ചിത്രം തിയറ്ററുകളിലെത്തും.