മലയാളികൾക്കിടയിൽ മാത്രമല്ല, തമിഴകത്തും ബോളിവുഡിലുമൊക്കെ ആരാധകരുള്ള നടനാണ് ബേസിൽ ജോസഫ്. ശിവകാര്‍ത്തികേയന്‍റെ പൊങ്കല്‍ ചിത്രം പരാശക്തിയിലൂടെ തമിഴിലേക്കും അരങ്ങേറ്റം കുറിച്ചിരിക്കുകയാണ് ബേസിൽ. ജനുവരി 10 നാണ് പരാശക്തി തിയറ്ററുകളിലെത്തിയത്.

അതിഥി വേഷത്തിലാണ് ബേസില്‍ ചിത്രത്തില്‍ എത്തിയത്. ഡോമന്‍ ചാക്കോ എന്നാണ് ബേസിൽ അവതരിപ്പിച്ചിരിക്കുന്ന കഥാപാത്രത്തിന്‍റെ പേര്. സ്ക്രീന്‍ ടൈം കുറവാണെങ്കിലും വലിയ കയ്യടിയാണ് തമിഴ്നാട്ടിലെ പല തിയറ്ററുകളിലും ബേസിലിന്റെ കഥാപാത്രത്തിന് ലഭിക്കുന്നത്. ആ കയ്യടിയിലൂടെ ബേസിലിന്‍റെ മുന്‍ പ്രകടനങ്ങള്‍ തങ്ങള്‍ കണ്ടിട്ടുണ്ടെന്ന കാര്യം കൂടിയാണ് പ്രേക്ഷകര്‍ പറയാതെ പറയുന്നത്.

മറ്റ് രണ്ട് അതിഥി വേഷങ്ങള്‍ കൂടി ചിത്രത്തില്‍ ഉണ്ട്. തെലുങ്ക് താരം റാണ ദഗുബാട്ടിയും കന്നഡ താരം ധനഞ്ജയയുമാണ് അത്. ഇരുധി സുട്രു, സൂരറൈ പോട്ര് തുടങ്ങിയ ചിത്രങ്ങളിലൂടെ ശ്രദ്ധ നേടിയ സുധ കൊങ്കരയാണ് സംവിധാനം. സുധയ്ക്കൊപ്പം അര്‍ജുന്‍ നടേശനും ഗണേശയും ചേര്‍ന്നാണ് തിരക്കഥ രചിച്ചിരിക്കുന്നത്.

ഡോണ്‍ പിക്ചേഴ്സ് ആണ് നിര്‍മ്മാണം. ഹിസ്റ്റോറിക്കല്‍ പൊളിറ്റിക്കല്‍ ഡ്രാമ ഗണത്തില്‍ പെടുന്ന ചിത്രം കഥ പറയുന്നത് തമിഴ്നാട്ടില്‍ 1965 ല്‍ നടന്ന ഹിന്ദി വിരുദ്ധ പ്രക്ഷോഭത്തിന്‍റെ പശ്ചാത്തലത്തിലാണ്.

ശിവകാര്‍ത്തികേയനൊപ്പം രവി മോഹന്‍, അഥര്‍വ, ശ്രീലീല, കുളപ്പുള്ളി ലീല, പ്രകാശ് ബാലവാടി, ദേവ് രാംനാഥ്, പൃഥ്വി രാജന്‍, ഗുരു സോമസുന്ദരം, ചേതന്‍, കാളി വെങ്കട്, പാപ്രി ഘോഷ് എന്നിവരാണ് മറ്റ് കഥാപാത്രങ്ങളെ അവതരിപ്പിച്ചിരിക്കുന്നത്. രവി കെ ചന്ദ്രന്‍ ആണ് ഛായാഗ്രഹണം.