ഒറ്റ കണ്ണിറുക്കലിലൂടെ ലോകമെമ്പാടും ആരാധകരെ നേടിയെടുത്ത നടിയാണ് പ്രിയ വാര്യർ. ഇപ്പോഴിതാ ഒറ്റ ചിരിയിലൂടെ പ്രിയ വീണ്ടും തരം​ഗമായി മാറിയിരിക്കുകയാണ്. അജിത് നായകനായെത്തിയ ​ഗുഡ് ബാഡ് അ​ഗ്ലിയാണ് പ്രിയയുടേതായി ഒടുവിൽ പ്രേക്ഷകരിലേക്കെത്തിയ ചിത്രം. ​ഗുഡ് ബാഡ് അ​ഗ്ലിയിൽ നിത്യ എന്ന കഥാപാത്രത്തെയാണ് പ്രിയ അവതരിപ്പിച്ചത്.

സിനിമ റിലീസ് ചെയ്തതിന് പിന്നാലെ പ്രിയയുടെ ​നൃത്ത രം​ഗവും സോഷ്യൽ മീഡിയയിൽ വൈറലായി മാറിയിരുന്നു. നടൻ അർജുൻ ദാസിനൊപ്പമുള്ള ​ചിത്രത്തിലെ പ്രിയയുടെ നൃത്തച്ചുവടുകളാണ് ട്രെൻഡിങ്ങായി മാറിയത്. ഇപ്പോഴിതാ അജിത്തിന് നന്ദി പറഞ്ഞുകൊണ്ട് പ്രിയ ഒരു കുറിപ്പ് പങ്കുവച്ചിരിക്കുകയാണ്. അജിത്തിന്റെ കടുത്ത ആരാധികയാണ് താനെന്നും പ്രിയ ഇൻസ്റ്റ​ഗ്രാമിൽ കുറിച്ചിട്ടുണ്ട്. ഒരു ആരാധിക കൂടിയായ തനിക്ക് താങ്കളോടൊപ്പം അഭിനയിക്കാൻ കഴിഞ്ഞത് ഭാഗ്യമായി കാണുന്നുവെന്നാണ് പ്രിയ വാര്യര്‍ കുറിച്ചത്.

ഗുഡ് ബാഡ് അ​ഗ്ലിയുടെ ഷൂട്ടിങ് തുടങ്ങിയത് മുതൽ അവസാനിക്കുന്നത് വരെ അജിത് നൽകിയ പരി​ഗണനയും സ്നേഹവും ഒരിക്കലും മറക്കില്ലെന്നും പ്രിയ പറയുന്നു. കുടുംബം, കാറുകൾ, യാത്രകൾ, റേസിങ് തുടങ്ങിയവയെ കുറിച്ച് സംസാരിക്കുമ്പോൾ താങ്കളുടെ കണ്ണുകളിലെ തിളക്കം എന്നെ അത്ഭുതപ്പെടുത്തി. തന്റെ കരിയറിലെ ഏറ്റവും പ്രിയപ്പെട്ട നിമിഷം അജിത് സാറിനൊപ്പം അഭിനയിച്ചതാണെന്നും പ്രിയ കുറിച്ചു.

Rajinikanth: ജയിലർ 2 ചിത്രീകരണത്തിനായി രജനികാന്ത് അട്ടപ്പാടിയില്‍; വൈറലായി വിഡിയോ

ഒരു വ്യക്തിയെന്ന നിലയിൽ നിങ്ങളെ അറിയാനും നിങ്ങളിലെ നടനോടൊപ്പം പ്രവർത്തിക്കാൻ എനിക്ക് അവസരം ലഭിച്ചതിലും വളരെയധികം നന്ദിയുള്ളവളായിരിക്കും താനെന്നും പ്രിയ കൂട്ടിച്ചേർത്തു. ആദിക് രവിചന്ദ്രൻ ആണ് ​ഗുഡ് ബാഡ് അ​ഗ്ലി സംവിധാനം ചെയ്തിരിക്കുന്നത്. അജിത്തിനൊപ്പം, തൃഷ കൃഷ്ണൻ, പ്രഭു, അർജുൻ ദാസ് തുടങ്ങിയവരും ചിത്രത്തിൽ പ്രധാന വേഷത്തിലെത്തി.