തിരുവനന്തപുരം സെക്രട്ടേറിയറ്റിന് മുൻപിൽ ലോവർ പ്രൈമറി സ്കൂൾ അധ്യാപക ഉദ്യോ​ഗാർഥികളുടെ സമരത്തിന് നേരെയുണ്ടായ പൊലീസ് നടപടിയിലും ബലപ്രയോ​ഗത്തിലും ശക്തമായ പ്രതിഷേധവുമായി അവതാരക രഞ്ജിനി ഹരിദാസ്. സമാധാനപരമായി നിരാഹാര സമരം അനുഷ്ഠിച്ചിരുന്ന ഉദ്യോഗാർഥികളെ സമരപ്പന്തൽ തകർത്ത് ബലമായി നീക്കം ചെയ്ത നടപടി തികച്ചും അപലപനീയമാണെന്നും,

മുൻപ് സമരങ്ങളുടെ മുൻനിരയിലുണ്ടായിരുന്നവർ തന്നെ ഭരണം നടത്തുമ്പോൾ ഇത്തരം സംഭവങ്ങൾ ആവർത്തിക്കുന്നത് അങ്ങേയറ്റം ഞെട്ടിപ്പിക്കുന്നതാണെന്നും രഞ്ജിനി പറഞ്ഞു. ജനാധിപത്യ രാജ്യത്ത് പ്രതിഷേധിക്കാനുള്ള അവകാശം ചോദ്യം ചെയ്യപ്പെടുന്ന സാഹചര്യത്തിൽ, വിഷയത്തിൽ സർക്കാർ അടിയന്തരമായി ഇടപെട്ട് അനുകൂലമായ പരിഹാരം കാണണമെന്നും രഞ്ജിനി ആവശ്യപ്പെട്ടു. ഇൻസ്റ്റഗ്രാമിൽ പങ്കുവച്ച വിഡിയോയിലാണ് രഞ്ജിനി ഹരിദാസ് തന്റെ നിലപാട് വ്യക്തമാക്കിയത്.

"ചില കാര്യങ്ങൾ പറയേണ്ടതുണ്ട് എന്ന് തോന്നുന്നു. തിരുവനന്തപുരത്ത് സെക്രട്ടേറിയറ്റിന് മുന്നിൽ ലോവർ പ്രൈമറി സ്കൂൾ ടീച്ചർ ഉദ്യോഗാർത്ഥികളുടെ സമരം നടക്കുന്നുണ്ട്. ഇതൊരു നിരാഹാര സമരമാണ്; ഏകദേശം 14–15 ദിവസങ്ങളായി ഇത് തുടരുന്നു എന്നാണ് ഞാൻ മനസ്സിലാക്കുന്നത്. അവർ ഉന്നയിക്കുന്ന ആവശ്യങ്ങൾ തികച്ചും ന്യായമാണ്.

പരീക്ഷ എഴുതി, ജോലി ലഭിക്കാനായി കാത്തിരിക്കുന്ന, വളരെയധികം അർപ്പണബോധമുള്ള ഉദ്യോഗാർഥികളാണിവർ. ഇവരുടെ ലക്ഷ്യങ്ങൾ നേടാൻ സഹായിക്കാമെന്ന് വാഗ്ദാനം ചെയ്തവർ തന്നെ, ഇന്നലെ ഇവരോട് പെരുമാറിയ രീതി ഒട്ടും അംഗീകരിക്കാനാവില്ല. സത്യം പറഞ്ഞാൽ, വിശ്വസിക്കാൻ പോലും കഴിയാത്ത കാര്യമാണിത്. ഡൽഹിയിലെ സമരങ്ങളും അവിടെ നടന്ന സംഭവങ്ങളും നമ്മൾ കണ്ടതാണ്; സമാധാനപരമായി സമരം ചെയ്തവരോട് എത്ര ക്രൂരമായാണ് പെരുമാറിയതെന്ന് നമ്മൾ കണ്ടതാണ്.

ഇപ്പോൾ, അതേ അവസ്ഥ കേരളത്തിലും ആവർത്തിക്കപ്പെടുന്നു. എനിക്ക് വലിയ ഞെട്ടലുണ്ടായി; സത്യത്തിൽ, ഞാൻ ഇതൊട്ടും പ്രതീക്ഷിച്ചിരുന്നില്ല. കാരണം, പണ്ട് ഇത്തരം സമരങ്ങളിൽ പങ്കെടുത്തവർ തന്നെയാണ് ഇപ്പോൾ ഈ സംസ്ഥാനം ഭരിക്കുന്നത്. അതുകൊണ്ട് തന്നെ ഒരു ചോദ്യം ചോദിക്കേണ്ടതുണ്ട്: സമാധാനപരമായി സമരം ചെയ്ത ഇവരെ, അവരുടെ സമ്മതമില്ലാതെ എന്തിനാണ് പൊലീസ് ബലമായി കൊണ്ടുപോയത് ?

‘ആരോഗ്യ പരിശോധന’ എന്ന പേരാണ് പറഞ്ഞതെങ്കിലും, അത് നടപ്പിലാക്കിയ രീതി... അത്രയും ബലപ്രയോഗത്തിലൂടെ, പിന്നെ സമരപ്പന്തൽ തകർത്തു കളഞ്ഞത്... ഇതിലെ യുക്തി എന്താണ്? എനിക്കിത് ഒട്ടും മനസ്സിലാകുന്നില്ല. ഇരട്ടത്താപ്പ് കാണിക്കാൻ പാടുണ്ടോ? ഒന്നു പറയുകയും മറ്റൊന്ന് പ്രവർത്തിക്കുകയും ചെയ്യുന്നത് ശരിയല്ലല്ലോ. അല്ലെങ്കിൽ, ഒരു സമരത്തിൽ പങ്കെടുത്ത് അവിടെ ചില കാര്യങ്ങൾ പറയുകയും, സ്വന്തം സംസ്ഥാനത്ത് അധികാരത്തിൽ വരുമ്പോൾ തികച്ചും വ്യത്യസ്തമായി പെരുമാറുകയും ചെയ്യുന്നത് എങ്ങനെ ശരിയാകും?

നിങ്ങൾക്ക് മനസ്സിലാകുന്നുണ്ടല്ലോ ഞാൻ എന്താണ് ഉദ്ദേശിക്കുന്നതെന്ന്? ഇതൊന്നും ഒട്ടും യോജിച്ചുപോകുന്നില്ല, മാത്രമല്ല ഇത് ഒട്ടും നല്ലൊരു കാഴ്ചയുമല്ല. സമരം ചെയ്യുക എന്നത് നമ്മുടെ അവകാശമാണ്. നിരാഹാര സമരത്തെ സംബന്ധിച്ചിടത്തോളം, അവരുടെ ആരോഗ്യം പ്രധാനമാണ് എന്നത് ശരി തന്നെ; എന്നാൽ അത് സമരസ്ഥലത്ത് വച്ചുതന്നെ നിരീക്ഷിക്കാവുന്നതേയുള്ളൂ.

അവിടെ ഡോക്ടർമാരെ എത്തിക്കാവുന്നതേയുള്ളൂ. ഇതവർ സ്വയം എടുത്ത തീരുമാനമാണ്, എല്ലാവരും കൂടി ചേർന്നെടുത്ത ഒരു തീരുമാനം. ആരോഗ്യം മോശമാവുകയാണെങ്കിൽ ഡോക്ടർമാർക്ക് ഇടപെടാനും ചികിത്സ നൽകാനും സാധിക്കും; എന്നാൽ അവരെ ഇത്തരത്തിൽ ബലമായി കൊണ്ടുപോകുന്നത് ഒട്ടും ശരിയായ നടപടിയല്ല. ഇത് ഒരു ജനാധിപത്യ വ്യവസ്ഥയ്ക്ക് ചേർന്നതല്ല; കാരണം സമാധാനപരമായി പ്രതിഷേധിക്കാനുള്ള അവകാശം ഒരു മൗലികാവകാശമാണ്.

സത്യം പറഞ്ഞാൽ, കേരളത്തിലെ സാഹചര്യത്തെക്കുറിച്ച് ഞാൻ എല്ലായിടത്തും അഭിമാനത്തോടെ സംസാരിക്കാറുണ്ടായിരുന്നു. കേരളത്തിൽ പ്രതിഷേധിക്കാനും, നമ്മുടെ ശക്തി പ്രകടിപ്പിക്കാനും, വിയോജിപ്പുകൾ ഉൾപ്പെടെയുള്ള അഭിപ്രായങ്ങൾ ധൈര്യത്തോടെ തുറന്നുപറയാനുമുള്ള സ്വാതന്ത്ര്യമുണ്ട്. അതാണ് നമ്മുടെ സമൂഹത്തിന്റെയും നാടിന്റെയും സ്വഭാവം.

എന്നിട്ടും, ഇങ്ങനെയൊരു സ്ഥലത്ത്, ഒരാൾ സംസാരിച്ചു തുടങ്ങുന്നതിന് മുൻപേ അടിച്ചമർത്തൽ നടപടികൾ ഉണ്ടാകുന്നു! എന്താണിത് ? ഇത് അംഗീകരിക്കാൻ കഴിയില്ല, ക്ഷമിക്കണം. ഞങ്ങൾ ഇതിനോട് പ്രതികരിക്കും. ഇതിനെക്കുറിച്ച് കൂടുതൽ എന്തു പറയാനാണ്? ഇത് ഒട്ടും അംഗീകരിക്കാനാവാത്ത കാര്യമാണ്. കേരള സർക്കാർ കൂടുതൽ ഉത്തരവാദിത്തത്തോടെ പ്രവർത്തിക്കണം.

ചർച്ചകളാണ് ഏറ്റവും നല്ല മാർഗ്ഗം; എല്ലാവരും ഒത്തിരുന്ന് ഈ വിഷയങ്ങൾ സംസാരിക്കട്ടെ. ഇവർ ഉന്നയിച്ചിരിക്കുന്ന ആശങ്കകൾ ന്യായമാണ്; ആവശ്യമായ പരീക്ഷകളെല്ലാം എഴുതിയിട്ടും, വർഷങ്ങളായി, അല്ല, വളരെക്കാലമായി, ജോലിക്കായി കാത്തിരിക്കുന്നവരാണിവർ. ഈ രീതി ഫലപ്രദമല്ലെങ്കിൽ, അത് അവസാനിപ്പിക്കുകയോ അല്ലെങ്കിൽ മുന്നോട്ട് പോകാൻ മറ്റൊരു വഴി കണ്ടെത്തുകയോ വേണം.

ഇതിനൊരു പരിഹാരം കാണേണ്ടതുണ്ട്; ഇതൊരു ഗൗരവകരമായ വിഷയമാണ്, ഇതിനൊരു പരിഹാരം അനിവാര്യമാണ്. പരിഹാരം കണ്ടെത്തുന്നതിന് പകരം, പ്രതിഷേധിക്കുന്നവരോട് ഇത്തരത്തിൽ പെരുമാറുന്നത് ഒട്ടും ശരിയല്ല. ഡൽഹിയിൽ കണ്ട അതേ കാഴ്ചകൾ ഇവിടെയും ആവർത്തിക്കപ്പെടുന്നതുപോലെ തോന്നുന്നു.

അതുകൊണ്ട്, എല്ലാവരും ഇതിനെതിരെ ശബ്ദമുയർത്തണം. എനിക്ക് ഇതിനെക്കുറിച്ച് സംസാരിക്കാതിരിക്കാൻ കഴിഞ്ഞില്ല, കാരണം... ഇത് ഒട്ടും അംഗീകരിക്കാനാവില്ല, ക്ഷമിക്കണം".- രഞ്ജിനി ഹരിദാസ് വിഡിയോയിൽ പറഞ്ഞു.