സൂര്യയെ നായകനാക്കി ആര്‍ ജെ ബാലാജി സംവിധാനം ചെയ്ത ചിത്രമാണ് 'കറുപ്പ്'. മെയ്‌ 14 നാണ് ചിത്രം തിയറ്ററിലെത്തുന്നത്. ഒരു പക്കാ മാസ് എന്റർടെയ്നർ ആകും കറുപ്പ് എന്നാണ് ഇതുവരെ വന്നിട്ടുള്ള അപ്‌ഡേറ്റുകളില്‍ നിന്ന് ലഭിച്ചിരിക്കുന്നത്. ഇപ്പോഴിതാ സിനിമയിലെ പാട്ടുകളെ കുറിച്ച് പറയുകയാണ് ആർ ജെ ബാലാജി.

സിനിമയിലേതായി ആദ്യം പങ്കുവെച്ച ഗാനം ആരാധകരെ നിരാശപ്പെടുത്തിയതിനെക്കുറിച്ചും ബാലാജി പറയുന്നു. സുധീര്‍ ശ്രീനിവാസന് നൽകിയ അഭിമുഖത്തിലാണ് ബാലാജി ഇക്കാര്യം പറഞ്ഞത്. "സിനിമയുടെ ഒരു അപ്‌ഡേറ്റും അഞ്ചു മാസമായി കൊടുത്തിട്ടില്ല. അപ്ഡേറ്റ് ചോദിക്കുന്ന ഫാൻസ്‌ സ്നേഹം കൊണ്ടാണ് ചോദിക്കുന്നത്.

അതുകൊണ്ട് തന്നെ പാട്ട് കൊടുക്കാം എന്ന് കരുതി. പടത്തിലെ സെക്കന്‍ഡ് സോങ്ങായി പ്ലാന്‍ ചെയ്തത് ‘റാത്തു രാസന്‍’ ആയിരുന്നു. പക്ഷേ ഈ പാട്ട് റിലീസ് ചെയ്യാൻ ടീമിലെ ആരും സമ്മതിച്ചില്ല. റിലീസിന് ശേഷം ‘നാങ്ക നാല് പേര്’ എന്ന പാട്ട് പുറത്തുവിടാമെന്നും തീരുമാനിച്ചു. പക്ഷേ എന്റെ അസിസ്റ്റന്റ്‌സിന്റെ നിര്‍ബന്ധം കാരണം ‘നാങ്ക നാല് പേര്’ ആദ്യം ഇറക്കി.

എല്ലാവരും ഞങ്ങളെ എയറിലാക്കി. സൂര്യയുടെ സിനിമയില്‍ സൂര്യയെ കാണിക്കാത്ത ഒരു പാട്ടായിരുന്നു അത്. ഇപ്പോൾ അജിത് ഫാന്‍സിന്റെ കാര്യം നോക്കിയാല്‍ അവര്‍ വിജയ്‌യുടെ സിനിമകളെ തെറി വിളിക്കും. വിജയ് ഫാന്‍സാണെങ്കില്‍ അജിതിന്റെ സിനിമകളെ തെറി വിളിക്കും.

സൂര്യയുടെ ഫാന്‍സ് മാത്രമാണ് ഞങ്ങളെ തെറി വിളിച്ചത്. ആ പാട്ടിന് കിട്ടിയ റെസ്‌പോണ്‍സ് കണ്ട് ഞാനും സായ്‌യും കുറച്ച് പേടിച്ചു. പക്ഷേ അത് ഞങ്ങളുടെ തെറ്റാണ്, നന്നായി വിശന്നിരിക്കുന്നവർക്ക് ചൂടുവെള്ളം കൊടുത്ത പോലെ ആണ്".- ആര്‍ജെ ബാലാജി പറഞ്ഞു.

‘നാങ്ക നാല് പേര്’ എന്ന പാട്ട് തനിക്ക് വളരെ ഇഷ്ടമാണെന്നും എന്നാൽ ഈ പാട്ട് സിനിമയിൽ ഉപയോഗിച്ചിട്ടില്ലെന്നും ബാലാജി കൂട്ടിച്ചേർത്തു. അതേസമയം രണ്ട് പതിറ്റാണ്ടുകള്‍ക്ക് ശേഷം സൂര്യയും തൃഷയും വീണ്ടും ഒന്നിക്കുന്നതും ഈ ചിത്രത്തിന്റെ പ്രത്യേകതയാണ്.