പുഷ്പയിലെ ഊ ആണ്ടവ എന്ന സാമന്തയുടെ ഐറ്റം ഡാൻസ് വൻ തരം​ഗമായി മാറിയിരുന്നു. അല്ലു അർജുനൊപ്പമുള്ള സാമന്തയുടെ ഈ ഡാൻസ് തെന്നിന്ത്യയിൽ മാത്രമല്ല ബോളിവുഡിലും സൂപ്പർ ഹിറ്റായി. ഇപ്പോഴിതാ ഈ ഡാൻസ് നമ്പർ ചെയ്തതിനെക്കുറിച്ച് സാമന്ത തുറന്നു പറയുകയാണ്. എൻ‍ഡിടിവി വേൾഡ് സമ്മിറ്റ് 2025 സെഷനിൽ സംസാരിക്കുകയായിരുന്നു സാമന്ത.

ആ ഡാൻസ് ചെയ്തത് തനിക്കൊരു വെല്ലുവിളിയായിരുന്നുവെന്നും സാമന്ത പറഞ്ഞു. പുഷ്പയിലെ ഐറ്റം സോങ്ങിൽ ഒപ്പിടാനുള്ള തീരുമാനം വ്യക്തിപരമായിരുന്നുവെന്നും തന്റെ അതിരുകൾ പരീക്ഷിക്കുന്നതിനാണ് ഇത് ചെയ്തതെന്നും നടി പറഞ്ഞു. "എനിക്ക് കഴിയുമോ എന്ന് നോക്കാനാണ് ഞാൻ 'ഊ ആണ്ടവ' ചെയ്തത്. ഞാൻ എനിക്ക് തന്നെ നൽകിയ ഒരു വെല്ലുവിളിയായിരുന്നു അത്. ഞാൻ ഒരിക്കലും എന്നെ സെക്സിയായി കരുതിയിരുന്നില്ല.

ആരും എനിക്ക് ഒരു 'ബോൾഡ് റോൾ' തരാൻ പോകുന്നില്ല. അതൊരിക്കൽ മാത്രമേ സംഭവിക്കുകയുള്ളൂ".- സാമന്ത പറഞ്ഞു. "ഊ ആണ്ടവ" എന്ന ഗാനത്തിന് സംഗീതം നൽകിയത് ദേവി ശ്രീ പ്രസാദ് ആണ്. റാമോജി റാവു ഫിലിം സിറ്റിയിൽ പ്രത്യേകം നിർമിച്ച സെറ്റിലാണ് ​ഗാനം ചിത്രീകരിച്ചത്. ഇന്ദ്രാവതി ചൗഹാൻ ആണ് ​ഗാനം ആലപിച്ചത്. ​ഗണേഷ് ആചാര്യയാണ് കൊറിയോ​ഗ്രഫർ.

വരുൺ ധവാനൊപ്പമുള്ള സിറ്റാഡൽ ഹണി ബണ്ണിയിലാണ് സാമന്ത അവസാനമായി അഭിനയിച്ചത്. ഇപ്പോൾ ഹൈദരാബാദിലാണ് സാമന്ത. മുഴുനീള വേഷങ്ങൾ ചെയ്യുന്നതിൽ നിന്ന് ഇപ്പോൾ ചെറിയ ഇടവേളയെടുത്തിരിക്കുകയാണ് സാമന്ത. തന്റെ ജീവിതത്തിലെ ചെറിയ ഭാഗം പോലും അറിഞ്ഞവർക്ക് വിവാഹമോചനം, അസുഖം തുടങ്ങിയ തന്റെ വ്യക്തിപരമായ വെല്ലുവിളികൾ പോലും പരസ്യമായി അറിയാം എന്ന് സാമന്ത പറഞ്ഞു.