മോഹൻലാൽ ചിത്രം തുടരുമിൽ ഒട്ടും പ്രതീക്ഷിക്കാതെ വന്ന് പ്രേക്ഷകരുടെ കൈയടി നേടിയ നടനാണ് സം​ഗീത് പ്രതാപ്. മോഹൻലാലിന്റെ കഥാപാത്രമായ ബെൻസിന്റെ അംബാസഡർ മാർക്ക് 1 ഓടിച്ചു പോകുന്ന സം​ഗീത് പ്രതാപിന്റെ കിരൺ എന്ന കഥാപാത്രം തിയറ്ററുകളിൽ ചിരിയുടെ മാലപ്പടക്കം തീർക്കുകയയും ചെയ്തു. തുടരുമിൽ സ്ക്രീൻ ടൈം വളരെ കുറവായിരുന്നെങ്കിലും മോഹൻലാലിനൊപ്പമുള്ള കോമ്പിനേഷൻ‍ രം​ഗങ്ങളിലൊക്കെ സം​ഗീത് തകർത്തഭിനയിച്ചു.

ഇപ്പോഴിതാ തുടരുമിലെ തന്റെ കഥാപാത്രത്തെക്കുറിച്ച് പറയുകയാണ് സം​ഗീത്. തുടരും പ്രഖ്യാപിച്ചതിന് പിന്നാലെ സംവിധായകൻ തരുൺ മൂർത്തിയോട് എന്തെങ്കിലും വേഷമുണ്ടോയെന്ന് താൻ മെസേജ് അയച്ചു ചോദിക്കുകയായിരുന്നുവെന്ന് സം​ഗീത് പറഞ്ഞു. തൊട്ടടുത്ത ദിവസം തന്നെ തരുൺ തനിക്കൊരു അതിഥി വേഷമുണ്ടെന്ന് പറഞ്ഞ് വിളിക്കുകയും ചെയ്തെന്ന് സം​ഗീത് ദ് ന്യൂ ഇന്ത്യൻ എക്സ്പ്രസിന് നൽകിയ അഭിമുഖത്തിൽ പറഞ്ഞു.

"മോഹൻലാൽ- ശോഭന ചിത്രത്തിന്റെ പ്രഖ്യാപനം വന്നപ്പോൾ, എനിക്ക് എന്തെങ്കിലും കഥാപാത്രമുണ്ടോ എന്ന് ചോദിച്ച് ഞാൻ തരുൺ മൂർത്തിക്ക് മെസേജ് അയച്ചു. തൊട്ടടുത്ത ദിവസം തന്നെ അദ്ദേഹം എന്നെ വിളിച്ച് ഒരു ചെറിയ അതിഥി വേഷം ഉണ്ടെന്ന് പറഞ്ഞു. എന്നാൽ അത് വെറും ഒരു കാമിയോ റോൾ ആയിരുന്നില്ല, സിനിമയിൽ അതിന് ശരിക്കും പ്രാധാന്യമുണ്ടായിരുന്നു.

ലാലേട്ടന്റെ കഥാപാത്രത്തിന്റെ രണ്ട് പ്രിയപ്പെട്ട കാര്യങ്ങളായ കാറിനെയും മകനെയും ബുദ്ധിമുട്ടിക്കുന്ന ഒരാളായിട്ടാണ് അദ്ദേഹം ആ കഥാപാത്രത്തെക്കുറിച്ച് എന്നോട് പറഞ്ഞത്. അതൊരു രസകരമായ വേഷമായിരുന്നു. ലാലേട്ടനോടൊപ്പം സമയം ചെലവഴിക്കാൻ അവസരം ലഭിച്ചതിൽ ഞാൻ വളരെ ആവേശത്തിലായിരുന്നു. 'തുടരും' സിനിമയുടെ ചിത്രീകരണത്തിനിടയിൽ ലാലേട്ടനൊപ്പം ശരിക്കും ഇടപെഴകാൻ അവസരം ലഭിക്കാത്തതിനാൽ എനിക്ക് അൽപ്പം സങ്കടമുണ്ടായിരുന്നു.

ആ സങ്കടം 'ഹൃദയപൂർവ്വം' എന്ന ചിത്രത്തോടെ അവസാനിച്ചു. ആ സെറ്റിൽ എല്ലാ ദിവസവും രാവിലെ 8 മുതൽ രാത്രി 9.30 വരെ ഞാൻ ലാലേട്ടനൊപ്പമായിരുന്നു. അതിശയകരമായ കാര്യമെന്താണെന്ന് വച്ചാൽ, തുടരും റിലീസ് ചെയ്തത് ഞാൻ അതിന്റെ ഷൂട്ടിങ് തുടങ്ങി കൃത്യം ഒരു വർഷം പൂർത്തിയായപ്പോഴായിരുന്നു.

അങ്ങനെ, ലാലേട്ടനെ ഞാൻ ആദ്യമായി കണ്ട അതേ ദിവസം തന്നെ സിനിമ റിലീസ് ചെയ്തു, ഞാൻ അദ്ദേഹത്തിന്റെ അടുത്തിരുന്ന് ഒരുമിച്ച് സിനിമ കണ്ടു. ആ ഒരു വർഷത്തിനുള്ളിൽ ഒരുപാട് മാറ്റങ്ങൾ സംഭവിച്ചു. അദ്ദേഹവുമായി ഇത്രയും അടുത്ത ബന്ധം സ്ഥാപിക്കാൻ കഴിഞ്ഞത് ഒരു ഭാഗ്യമായി ഞാൻ കരുതുന്നു.- സം​ഗീത് പറഞ്ഞു.

'എ ചിത്രങ്ങളിൽ അഭിനയിച്ചത് അവരുടെ ഇമേജിനെ വല്ലാതെ ബാധിച്ചു'; മോഹൻലാലിന്റെ നായികയ്ക്ക് സംഭവിച്ചതിനെക്കുറിച്ച് ആലപ്പി അഷ്റഫ്

വർഷങ്ങൾക്ക് ശേഷം സത്യൻ അന്തിക്കാടും മോഹൻലാലും ഒന്നിച്ചെത്തുന്ന ചിത്രമാണ് ഹൃദയപൂർവം. മാളവിക മോഹനൻ ആണ് ചിത്രത്തിൽ നായികയായെത്തുന്നത്.