ഡാൻസ് റിയാലിറ്റി ഷോയിലൂടെ സിനിമയിലെത്തിയവരാണ് നടി സാനിയ അയ്യപ്പനും നടൻ റംസാനും. ഇരുവരും അടുത്ത സുഹൃത്തുക്കൾ കൂടിയാണ്. ഇടയ്ക്ക് സാനിയയും റംസാനും ഡാൻസ് വിഡിയോയുമായും സോഷ്യൽ മീഡിയയിൽ എത്താറുണ്ട്.

ഇപ്പോഴിതാ റംസാന് പിറന്നാൾ ആശംസകൾ നേർന്ന് സാനിയ പങ്കുവച്ചിരിക്കുന്ന കുറിപ്പാണ് സോഷ്യൽ മീഡിയയിൽ ശ്രദ്ധേയമാകുന്നത്. "എനിക്ക് എട്ട് വയസുള്ളപ്പോഴാണ് നിന്നെ ഞാൻ കണ്ടുമുട്ടുന്നത്. അന്ന് നിനക്ക് 12 വയസായിരുന്നു. ജീവിതം നമ്മളെ ഒരുമിച്ച് വളർത്തി.

നിന്റെ ഉയർച്ചയും പോരാട്ടവും നിശബ്ദമായി നീ നടത്തുന്ന യുദ്ധവും അതിലൂടെ നീ നേടിയെടുത്ത മനോബലവും ഒക്കെ ഞാൻ കണ്ടു. ഇന്നിപ്പോൾ 27-ാം വയസിൽ നിന്നെ കാണുമ്പോൾ എനിക്കൊരുപാട് അഭിമാനമുണ്ട്. നിന്റെ എല്ലാ കഠിനമായ യാത്രയിലും ഞാൻ കൂടെയുണ്ടായിരുന്നു. ഇനിയും കൂടെയുണ്ടാകും. പിറന്നാൾ ആശംസകൾ റംസാൻ".- എന്നാണ് സാനിയ കുറിച്ചിരിക്കുന്നത്.

നിരവധി പേരാണ് റംസാന് പിറന്നാൾ ആശംസകൾ നേരുന്നത്. വരവ്, മാഡി എന്നിവയാണ് സാനിയയുടേതായി അണിയറയിൽ ഒരുങ്ങുന്ന ചിത്രങ്ങൾ. സാഹസം ആണ് റംസാന്റേതായി ഒടുവിൽ തിയറ്ററുകളിലെത്തിയ ചിത്രം. മമ്മൂട്ടി ചിത്രം ഭീഷ്മപർവത്തിലെ രതിപുഷ്പം എന്ന റംസാന്റെ ഡാൻസ് ഏറെ ശ്രദ്ധ നേടിയിരുന്നു.