മലയാളികള്‍ക്ക് ഏറെ സുപരിചിതയായ ഗായികയാണ് സയനോര ഫിലിപ്പ്. മലയാളത്തില്‍ മാത്രമല്ല മറ്റ് തെന്നിന്ത്യന്‍ ഭാഷകളിലും സയനോര പാട്ടുകള്‍ പാടിയിട്ടുണ്ട്. ഗായിക എന്നതിലുപരിയായി സംഗീത സംവിധായകയും ഡബ്ബിങ് ആർട്ടിസ്റ്റുമൊക്കെയാണ് സയനോര. അഭിനയത്തിലും സയനോര സാന്നിധ്യം അറിയിച്ചിട്ടുണ്ട്. അതേസമയം ത്‌ന്റെ അഭിപ്രായങ്ങളും നിലപാടുകളും തുറന്ന് പറയാനും സയനോര മടിക്കാറില്ല.

ഈ വർഷത്തെ ഓണം റിലീസായെത്തിയ ലോക ചാപ്റ്റർ 1 ചന്ദ്ര, ഓടും കുതിര ചാടും കുതിര എന്നീ ചിത്രങ്ങളിൽ നടി കല്യാണി പ്രിയ​ദർശന് ഡബ്ബ് ചെയ്തിരിക്കുന്നതും സയനോരയാണ്. ഇപ്പോഴിതാ സയനോര തന്റെ പുതിയ കവർ സോങുമായെത്തിയിരിക്കുകയാണ്. സർവകലാശാല എന്ന ചിത്രത്തിലെ അതിരു കാക്കും മലയൊന്നു തുടുത്തേ... എന്ന പാട്ടുമായാണ് സയനോര എത്തിയിരിക്കുന്നത്.

ടൈറ്റ്ലോസ് ആണ് ​ഗാനത്തിന്റെ പുതിയ വെർഷൻ സംവിധാനം ചെയ്തിരിക്കുന്നത്. ​​നിരവധി പേരാണ് സയനോരയുടെ പുതിയ പാട്ടിനെ അഭിനന്ദിച്ച് രം​ഗത്തെത്തിയിരിക്കുന്നത്. ഗായകൻ ജി വേണു​ഗോപാലും സയനോരയ്ക്ക് ആശംസകൾ നേർന്നിട്ടുണ്ട്. നമ്മുടെ സ്വന്തം ഷക്കീറയാണ് അവൾ എന്നാണ് ജി വേണു​ഗോപാൽ പാട്ടിന്റെ ലിങ്ക് പങ്കുവച്ച് കുറിച്ചിരിക്കുന്നത്.

അതിരു കാക്കും മലയൊന്ന് തുടുത്തേ... ഹെവി അഡാപ്റ്റേഷൻ. നന്നായിട്ടുണ്ട് സയനോര- എന്നും വേണു​ഗോപാൽ അഭിനന്ദിച്ചിട്ടുണ്ട്. അതേസമയം വേണു നാ​ഗവള്ളി സംവിധാനം ചെയ്ത് 1987 ൽ പുറത്തുവന്ന ചിത്രമാണ് സർവകലാശാല.

മോഹൻലാൽ, നെടുമുടി വേണു, ശ്രീനാഥ്, സുകുമാരൻ, സീമ തുടങ്ങിയവരാണ് ചിത്രത്തിൽ പ്രധാന വേഷങ്ങളിലെത്തിയത്. കാവാലം നാരായണ പണിക്കരുടെ വരികൾക്ക് സം​ഗീതമൊരുക്കിയത് എംജി രാധാകൃഷ്ണൻ ആണ്.