തരുൺ മൂർത്തി സംവിധാനം ചെയ്യുന്ന തുടരും തിയറ്ററുകളിൽ വിജയകരമായി പ്രദർശനം തുടരുകയാണ്. ഇന്നലെ ചിത്രത്തിലെ കൊണ്ടാട്ടം എന്ന പ്രൊമോ സോങ്ങും പുറത്തുവന്നിരുന്നു. ഈ പാട്ടിനും സോഷ്യൽ മീഡിയയിൽ വൻ സ്വീകാര്യതയാണ് ലഭിക്കുന്നത്. തുടരുമിന്റെ വിജയത്തിനിടെ തന്റെ പുതിയ ചിത്രത്തിന്റെ ടൈറ്റിൽ പോസ്റ്റർ പുറത്തുവിട്ടിരിക്കുകയാണ് തരുൺ മൂർത്തി.

‘ടോർപിഡോ’ എന്നാണ് ചിത്രത്തിന്റെ പേര്. ഫഹദ് ഫാസിൽ, നസ്‌ലിൻ, ഗണപതി, തമിഴ് നടൻ അർജുൻ ദാസ് എന്നിവരാണ് ചിത്രത്തിൽ പ്രധാന വേഷത്തിലെത്തുന്നത്. നടൻ ബിനു പപ്പു ആണ് ടോർപിഡോയ്ക്ക് വേണ്ടി തിരക്കഥയൊരുക്കുന്നത്. ഫഹദ് ഫാസിലും നസ്‌‌ലിനും ഒന്നിക്കുമ്പോൾ തന്നെ വേറെ ലെവൽ ആയിരിക്കുമെന്നാണ് സോഷ്യൽ മീഡിയയിൽ നിറയുന്ന കമന്റുകൾ.

ആഷിഖ് ഉസ്മാൻ ആണ് നിർമാണം. ജിംഷി ഖാലിദ് ആണ് ചിത്രത്തിന് ഛായാ​ഗ്രഹണമൊരുക്കുന്നത്. ചെറിയ ഇടവേളയ്ക്ക് ശേഷം സംഗീത സംവിധായകൻ സുഷിൻ ശ്യാം തിരികെയെത്തുന്നു എന്ന പ്രത്യേകതയും ചിത്രത്തിനുണ്ട്. ‘ടോർപിഡോ’ ടൈറ്റിൽ പോസ്റ്റർ ഇതിനകം ശ്രദ്ധേയമായിക്കഴിഞ്ഞു.

തൊഴിലാളി ദിനത്തിൽ അക്കൗണ്ടിലേക്ക് ഒരു തുക; രേഖാചിത്രം ടീമിന് നിർമാതാവിന്റെ സർപ്രൈസ്

‘തുടരും’ എന്ന മോഹൻലാൽ ചിത്രത്തിലൂടെ ഹിറ്റടിച്ച തരുൺ മൂർത്തിയുടെ സംവിധാന മികവ് വീണ്ടും ആസ്വദിക്കാൻ ആവേശത്തോടെ കാത്തിരിക്കുകയാണ് ആരാധകർ. ഓപ്പറേഷൻ ജാവ, സൗദി വെള്ളക്ക എന്നീ ചിത്രങ്ങൾക്ക് ശേഷം തരുൺ മൂർത്തി ഒരുക്കിയ ചിത്രമാണ് തുടരും. അതേസമയം ആലപ്പുഴ ജിംഖാനയാണ് നസ്‌ലിന്റേതായി ഒടുവിൽ പ്രേക്ഷകരിലേക്കെത്തിയ ചിത്രം. സമ്മിശ്ര പ്രതികരണമായിരുന്നു ചിത്രത്തിന് തിയറ്ററുകളിൽ നിന്ന് ലഭിച്ചതും.