കഴിഞ്ഞ മാസമാണ് നടൻ ടൊവിനോ തോമസിന് ഷൂട്ടിങ്ങിനിടെ പരുക്കേൽക്കുന്നത്. വയറിന് പരുക്കേറ്റ താരം ഏറെ നാളായി വിശ്രമത്തിലായിരുന്നു. ചെറിയ ഇടവേളയ്ക്ക് ശേഷം ലൊക്കേഷനിലേക്ക് തിരിച്ചെത്തിയിരിക്കുകയാണ് താരം. മനു അശോകൻ സംവിധാനം ചെയ്യുന്ന 'കാണെക്കാണെ' എന്ന ചിത്രത്തിന്റെ ലൊക്കേഷനിലേക്കാണ് താരം എത്തിയത്. പരുക്കുമാറി തിരിച്ചെത്തിയ താരത്തിന് അണിയറ പ്രവർത്തകർ വമ്പൻ സ്വീകരണമാണ് ഒരുക്കിയത്. 

കൊച്ചിയിലാണ്  'കാണെക്കാണെയുടെ ചിത്രീകരണം. മനു അശോകൻ പൂക്കൾ നൽകിയാണ് ടൊവിനോയെ സ്വീകരിച്ചു. താരത്തിനായി സ്പെഷ്യൽ കേക്കും ഒരുക്കിയിരുന്നു. ചിത്രത്തിൽ നായികയായി എത്തുന്ന ഐശ്വര്യ ലക്ഷ്മിയും ടൊവിനോയെ സ്വീകരിക്കാനുണ്ടായിരുന്നു. 

ഉയരെയ്ക്ക് ശേഷം ബോബി സഞ്ജയ്-ടൊവിനോ-മനു അശോകകൻ ടീം ഒന്നിക്കുന്ന ചിത്രമാണ് കാണെക്കാണെ. സുരാജ് വെഞ്ഞാറമ്മൂട്, ശ്രുതി രാമചന്ദ്രൻ എന്നിവരാണ് ചിത്രത്തിൽ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. ആൽബി ആന്റണി ഛായാഗ്രഹണം നിർവഹിക്കുന്ന കാണെക്കാണെയുടെ എഡിറ്റർ അഭിലാഷ് ബാലചന്ദ്രനാണ്. വിനായക് ശശികുമാറിന്റെ വരികൾക്ക് രഞ്ജിൻ രാജ് ആണ് സംഗീതം നൽകുന്നത്. 

രോഹിത് ബിഎസ് സംവിധാനം ചെയ്യുന്ന കളയുടെ ഷൂട്ടിങ്ങിനിടെയാണ് ടൊവിനോയ്ക്ക് പരുക്കേറ്റത്. സംഘട്ടന രംഗം ചിത്രീകരിക്കുന്നതിനിടെയായിരുന്നു അപകടം. ഇന്റേണൽ ബ്ലീഡിങ് ഉണ്ടായതിനെ തുടർന്ന് താരത്തെ കൊച്ചിയിലെ സ്വകാര്യ ആശുപത്രിയിൽ പ്രവേശിപ്പിച്ചിരുന്നു. ആശുപത്രിയിൽ നിന്ന് ഡിസ്ചാർജ് ചെയ്ത താരത്തിന് നീണ്ട നാളത്തെ വിശ്രമവും ഡോക്ടർമാർ നിർദേശിച്ചിരുന്നു. അതിനെല്ലാം ശേഷമാണ് ടൊവിനോ തിരിച്ചെത്തിയത്.