മനു അശോകന്‍ സംവിധാനം ചെയ്യുന്ന കാണെക്കാണെയുടെ ഫസ്റ്റ് ലുക്ക് പുറത്ത്. ടൊവിനോ തോമസും ഐശ്വര്യ ലക്ഷ്മിയും ഒന്നിക്കുന്ന ചിത്രത്തില്‍ സുരാജ് വെഞ്ഞാറമൂടും പ്രധാന വേഷത്തില്‍ എത്തുന്നുണ്ട്. ഇവര്‍ മൂന്നുപേരെയും ഉള്‍പ്പെടുത്തിക്കൊണ്ടാണ് ചിത്രത്തിനന്റെ ആദ്യ പോസ്റ്റര്‍. 

നിറചിരിയോടെ നില്‍ക്കുന്ന ടൊവിനോയും ഐശ്വര്യയുടേയും അവ്യക്തമായ ചിത്രവും ഗൗരവഭാവത്തിലുള്ള സുരാജുമാണ് പോസ്റ്ററില്‍. ആരാധകരുടെ കയ്യടി നേടുകയാണ് പോസ്റ്റര്‍. ഈ ചിത്രത്തിലും സുരാജ് അമ്പരപ്പിക്കുമോ എന്നാണ് പോസ്റ്റര്‍ കണ്ട് ആരാധകര്‍ ചോദിക്കുന്നത്. ശ്രുതി രാമചന്ദ്രനും ചിത്രത്തില്‍ പ്രധാന വേഷത്തില്‍ എത്തുന്നുണ്ട്.

ഉയരേയ്ക്ക് ശേഷം മനു അശോകന്‍ സംവിധാനം ചെയ്യുന്ന ചിത്രമാണ് ഇത്. ബോബി സഞ്ജയുടേതാണ് തിരക്കഥ. 1983, ക്വീന്‍ എന്നീ ബ്ലോക്ക്ബസ്റ്റര്‍ ചിത്രങ്ങള്‍ മലയാള സിനിമക്ക് സമ്മാനിച്ച ടി ആര്‍ ഷംസുദ്ധീനാണ് സിനിമ നിര്‍മിക്കുന്നത്. ആല്‍ബി ആന്റണി ഛായാഗ്രഹണം നിര്‍വഹിക്കുന്ന കാണെക്കാണെയുടെ എഡിറ്റര്‍ അഭിലാഷ് ബാലചന്ദ്രനാണ്. വിനായക് ശശികുമാറിന്റെ വരികള്‍ക്ക് രഞ്ജിന്‍ രാജ് ആണ് സംഗീതം നല്‍കുന്നത്.