ബോളിവുഡിൽ മാത്രമല്ല തെന്നിന്ത്യയിലും നിറയെ ആരാധകരുള്ള സിനിമകളാണ് 3 ഇഡിയറ്റ്സും മുന്നാ ഭായ് എംബിബിഎസും. ഈ ചിത്രങ്ങൾക്ക് സീക്വലുകളുണ്ടാകുമെന്ന തരത്തിൽ അഭ്യൂഹങ്ങളും പരന്നിരുന്നു. ഇപ്പോഴിതാ തുടർ ഭാഗങ്ങളുണ്ടാകുമെന്ന് സ്ഥിരീകരിച്ചിരിക്കുകയാണ് സംവിധായകനും നിർമാതാവും തിരക്കഥാകൃത്തുമായ വിധു വിനോദ് ചോപ്ര. അടുത്തിടെ ഒരു മാധ്യമത്തിന് നൽകിയ അഭിമുഖത്തിലാണ് വിധു ചോപ്ര ഇക്കാര്യം പറഞ്ഞത്.

"2 ഇഡിയറ്റ്സ്, മുന്നാ ഭായ് 3 എന്നീ ചിത്രങ്ങൾക്കായുള്ള കഥ എഴുതിക്കൊണ്ടിരിക്കുകയാണിപ്പോൾ. അതിന് പുറമേ കുട്ടികൾക്കായി ഒരു സിനിമ നിർമിക്കാനുള്ള ശ്രമത്തിലുമാണ്. ഈ സിനിമയുടെ പേര് ഇതുവരെ തീരുമാനിച്ചിട്ടില്ല. ഒരു ഹൊറർ കോമഡിയും ഞാൻ എഴുതുന്നുണ്ട്, അത് വളരെ രസകരമായിരിക്കും. ആദ്യം അടുത്ത ഒന്ന് രണ്ട് വർഷത്തേക്കുള്ള കഥയാണ് എഴുതുന്നത്. പിന്നെ അത് നിർമിക്കണം. 2 ഇഡിയറ്റ്‌സും മുന്നാ ഭായ് 3യും ഉടനെ ഉണ്ടാകുമെന്ന് പ്രതീക്ഷിക്കുന്നു".- വിധു ചോപ്ര പറഞ്ഞു.

തന്റെ തന്നെ സിനിമകളുടെ തിരക്കഥകൾ പൂർത്തിയാക്കാൻ എന്തിനാണ് ഇത്രയും സമയമെടുക്കുന്നത് എന്ന ചോദ്യത്തിനും അദ്ദേഹം മറുപടി പറഞ്ഞു. "എനിക്ക് വേണമെങ്കിൽ മുന്നാ ഭായിയുടെയും 3 ഇഡിയറ്റ്സിന്റെയും 2-3 തുടർഭാഗങ്ങൾ ചെയ്യാമായിരുന്നു. എനിക്ക് ധാരാളം പണം സമ്പാദിക്കാമായിരുന്നു. ഞാൻ ഒരു വലിയ കാറും വലിയ വീടും വാങ്ങി. പക്ഷേ അവ നല്ല സിനിമകളായിരുന്നില്ല എങ്കിൽ, ഞാൻ അതിനെക്കുറിച്ച് സംസാരിക്കാൻ പോലും ഇഷ്ടപ്പെടുമായിരുന്നില്ല".- വിധു ചോപ്ര വ്യക്തമാക്കി.

'റാം ചരണിന്റെ സ്ക്രീൻ പ്രെസൻസ് തന്നെ മികച്ചതാണ്; ആർആർആറിന് മുൻപ് തന്നെ നായകനായി തീരുമാനിച്ചിരുന്നു'

വിധു വിനോദ് ചോപ്ര നിർമിച്ച 3 ഇഡിയറ്റ്സും മുന്നാ ഭായ് എംബിബിഎസും സംവിധാനം ചെയ്തത് രാജ്കുമാർ ഹിരാനിയായിരുന്നു. രണ്ട് ചിത്രങ്ങളും ബോക്സോഫീസിൽ സൂപ്പർ ഹിറ്റുകളായി മാറുകയും ചെയ്തു.