ഗീതു മോഹൻദാസ് സംവിധാനം ചെയ്ത ‘ടോക്സിക്’ സിനിമ റിലീസായതിന് പിന്നാലെ സമൂഹമാധ്യമങ്ങളിൽ വലിയ ചർച്ചകളാണ് ഉയരുന്നത്. ആദ്യ ഷോയ്ക്ക് പിന്നാലെ ചിത്രത്തിന് മോശം പ്രതികരണമാണ് ലഭിച്ചു കൊണ്ടിരിക്കുന്നത്. ചിത്രത്തിന്റെ സാങ്കേതിക വശങ്ങൾ മികവ് പുലർത്തിയെങ്കിലും തിരക്കഥയും സംഭാഷണങ്ങളുമൊക്കെ വളരെ മോശമാണെന്നുമാണ് സിനിമ കണ്ടവർ ഒന്നടങ്കം പറയുന്നത്.

ഇപ്പോഴിതാ നടൻ വിനായകൻ പങ്കുവച്ച പോസ്റ്റ് ശ്രദ്ധേയമാകുകയാണ്. ഗീതു മോഹൻദാസിന്റെ ചിത്രം പങ്കുവച്ചുകൊണ്ട് ‘ഡബ്ല്യുസിസിയിൽ നിന്നുള്ള 'ദ് അൾട്ടിമേറ്റ് ഫിലിം മേക്കർ’ എന്നാണ് വിനായകൻ കുറിച്ചത്. പോസ്റ്റിൽ മറ്റൊന്നും വിനായകൻ പരാമർശിച്ചിട്ടില്ല. താരം എന്താണ് ഉദ്ദേശിച്ചതെന്ന് ആരാധകർ ചോദിക്കുന്നുണ്ട്.

നിരവധി പേരാണ് വിനായകന്റെ പോസ്റ്റിന് താഴെ കമന്റുമായെത്തിയിരിക്കുന്നത്. 'എന്താ സാർ, കൂടുതൽ നന്നായി പോയോ ?', 'കരിയറിൻ്റെ ടോപ്പിൽ നിന്ന നിവിനെ തുലച്ചു വിട്ടു... ഇപ്പോൾ പാൻ ഇന്ത്യൻ സ്റ്റാർ ആയി നിന്ന യഷിനെയും', 'യഷിനെ ആരാണ് ഇങ്ങനെ ഒരു പടു കുഴിയിൽ ചാടിച്ചത് ?'.- എന്നാണ് പലരും കമന്റ് ചെയ്തിരിക്കുന്നത്.

'ടോക്സിക്' സിനിമയെക്കുറിച്ചുള്ള അഭിപ്രായങ്ങൾ പ്രേക്ഷകർ പങ്കുവയ്ക്കുന്നതിനിടെ വിനായകന്റെ പോസ്റ്റും ചർച്ചയാകുകയാണ്. യഷിനെ നായകനാക്കി ഗീതു മോഹൻദാസ് ഒരുക്കിയ ‘ടോക്സിക്’ പാൻ ഇന്ത്യൻ റിലീസായാണ് എത്തിയത്.

യഷിന് പുറമെ കിയാര അദ്വാനി, നയൻതാര, ഹുമ ഖുറേഷി, താര സുതാരിയ, രുക്മിണി വസന്ത് എന്നിവരടങ്ങുന്ന വൻ താരനിരയാണ് ചിത്രത്തിൽ അണിനിരക്കുന്നത്. യഷ് അവതരിപ്പിക്കുന്ന കഥാപാത്രത്തിന്റെ സഹോദരിയുടെ വേഷത്തിലാണ് ചിത്രത്തിൽ നയൻതാര ചിത്രത്തിലെത്തിയിരിക്കുന്നത്.