'ഈ വർഷത്തെ എന്റെ ഓണം ധന്യമായി'; മധുവിനൊപ്പം ഓണം ആഘോഷിച്ച് മനോജ് കെ ജയൻ, ഹൃദ്യമായ കുറിപ്പുമായി താരം

എക്കാലത്തെയും മലയാളികളുടെ പ്രിയ നടൻ മധുവിനൊപ്പം ഓണം ആഘോഷിച്ച് നടൻ മനോജ് കെ ജയനും കുടുംബവും. മനോജ് കെ ജയൻ തന്നെയാണ് ഇക്കാര്യം പങ്കുവച്ചത്. മധുവിന്റെ വീട്ടിലെത്തിയായിരുന്നു മനോജ് കെ ജയൻ അദ്ദേഹത്തെ കണ്ടത്. ചിത്രങ്ങൾക്കൊപ്പം മനോഹരമായ കുറിപ്പും മനോജ് കെ ജയൻ പങ്കുവച്ചിട്ടുണ്ട്.

ഈ വർഷത്തെ എന്റെ ഓണം ധന്യമായി എന്ന ക്യാപ്ഷനോടെയാണ് മനോജിന്റെ കുറിപ്പ്. "ധന്യ മുഹൂർത്തം..ഈ വർഷത്തെ എന്റെ ഓണം ധന്യമായി, മലയാള സിനിമാ തറവാട്ടിലെ കാരണവരായ, ജീവിക്കുന്ന ഇതിഹാസമായ …എത്രയും ആദരണീയനായ മധുസാറിനെ കുടുംബസമേതം അദ്ദേഹത്തിന്റെ വസതിയിൽ പോയി നേരിട്ട് കാണുകയും അദ്ദേഹത്തിന് ഓണാശംസകൾ നേർന്ന്,

അനുഗ്രഹം വാങ്ങി ഒരു ഓണക്കോടി നൽകാൻ സാധിക്കുകയും ചെയ്തത് ഈ വർഷത്തെ എന്റെ ഓണം സാർത്ഥകമാകുന്നു. മധു സാറിന് എല്ലാ ആയുരാരോഗ്യസൗഖ്യങ്ങളും നേരുന്നു. അതോടൊപ്പം എന്നെ സ്നേഹിക്കുന്ന എല്ലാ പ്രിയപ്പെട്ടവർക്കും ഹൃദയത്തിന്റെ ഭാഷയിൽ ഓണാശംസകൾ അറിയിക്കുന്നു".- എന്നാണ് മനോജ് കെ ജയൻ കുറിച്ചിരിക്കുന്നത്.

ജൂഡ് ആന്തണി ജോസഫ് സംവിധാനം ചെയ്യുന്ന തുടക്കം ആണ് മനോജ് കെ ജയൻ അഭിനയിച്ച് ഒടുവിൽ തിയറ്ററുകളിലെത്തിയിരിക്കുന്ന ചിത്രം. ഹലോ ഡിയർ, അതിമനോഹരം എന്നിവയാണ് അദ്ദേഹത്തിന്റേതായി ഇനി റിലീസിനൊരുങ്ങുന്ന ചിത്രങ്ങൾ.