'സങ്കടവും സന്തോഷവും മാറി മാറി വരും, ജീവിതം അങ്ങനെയാണല്ലോ; അമ്മ ഞങ്ങളെ വിട്ടു പോയതിനാൽ ഇത്തവണ ഓണം ആഘോഷിക്കുന്നില്ല'

ഓണം റിലീസായി ഇത്തവണ സിനിമകളൊന്നുമില്ലെങ്കിലും 'ഖലീഫ', 'തുടക്കം' എന്നീ സിനിമകളിലൂടെ കാമിയോ റോളിലെത്തി കയ്യടി വാരിക്കൂട്ടിയിരിക്കുകയാണ് മലയാളികളുടെ പ്രിയപ്പെട്ട മോഹൻലാൽ. ഇപ്പോഴിതാ തിരുവോണ ദിനത്തോട് അനുബന്ധിച്ച് 24 ന്യൂസ് ചാനലിന് നല്‍കിയ അഭിമുഖത്തില്‍ തന്റെ അമ്മയുടെ വിയോഗത്തെ കുറിച്ച് മോഹന്‍ലാല്‍ പറഞ്ഞ വാക്കുകളാണ് ശ്രദ്ധ നേടുന്നത്.

അമ്മയുടെ വിയോഗത്തെ തുടര്‍ന്ന് ഈ ഓണം തങ്ങള്‍ ആഘോഷിക്കുന്നില്ലെന്ന് താരം പറഞ്ഞു. "ഒരു സന്തോഷവും സങ്കടവുമുള്ള ഓണമാണ് ഇത്തവണ. ഇപ്രാവശ്യം ഞങ്ങള്‍ ഓണം ആഘോഷിക്കുന്നില്ല. കാരണം അമ്മ ഞങ്ങളെ വിട്ടുപോയ സമയമാണിപ്പോള്‍.

ജീവിതം അങ്ങനെയാണല്ലോ. സങ്കടവും സന്തോഷവും മാറി മാറി വരും. ഇത്തവണ അതുകൊണ്ട് തന്നെ പ്രത്യേകിച്ച് ഒരു സന്തോഷവും സങ്കടവുമില്ല. എങ്കിലും ഒരുപാട് വര്‍ഷത്തെ ആഗ്രഹത്തിനൊടുവില്‍ മായയുടെ ചിത്രം സാധ്യമായതില്‍ സന്തോഷമാണ്.

സ്‌കൂളില്‍ പഠിക്കുമ്പോഴും മറ്റും നാടകങ്ങളില്‍ അഭിനയിക്കുകയും ബെസ്റ്റ് ആക്ടര്‍ ആവുകയും ചെയ്തിട്ടുണ്ട്. അതിനാല്‍ തന്നെ അങ്ങനെയൊരു ആഗ്രഹം പറഞ്ഞപ്പോള്‍ അത് സാധ്യമാക്കി നല്‍കാനുള്ള ഭാഗ്യം ഞങ്ങള്‍ക്കുണ്ടായി. തീര്‍ച്ചയായും ആന്റണി പെരുമ്പാവൂരിനോടും ജൂഡിനോടും അതിനുള്ള നന്ദി ഈ അവസരത്തില്‍ അറിയിക്കുന്നു". - മോഹൻലാൽ പറഞ്ഞു.