'പവിത്രം' സിനിമയിലെ ചേട്ടച്ചനെയും മീനാക്ഷിയെയും അത്ര വേ​ഗമൊന്നും മലയാളികൾ മറക്കാനിടയില്ല. ടി കെ രാജീവ് കുമാറിന്റെ സംവിധാനത്തിൽ 1994 ൽ പുറത്തിറങ്ങിയ ചിത്രത്തിൽ ചേട്ടച്ചനായി മോഹൻലാലെത്തിയപ്പോൾ മീനാക്ഷിയായി എത്തിയത് വിന്ദുജ മേനോൻ ആയിരുന്നു.

വർഷങ്ങൾക്ക് ശേഷവും ആ സ്നേഹബന്ധം അതുപോലെ കാത്തുസൂക്ഷിക്കുന്ന മോഹൻലാലിന്റെയും വിന്ദുജ മേനോന്റെയും ചിത്രങ്ങളാണ് സോഷ്യൽ മീഡിയയിൽ വൈറലാകുന്നത്. മോഹൻലാലിനൊപ്പം നിൽക്കുന്ന മനോഹരമായ ചിത്രങ്ങൾ വിന്ദുജ തന്നെയാണ് സോഷ്യൽ മീഡിയയിലൂടെ പങ്കുവെച്ചത്.

'എന്റെ ചേട്ടച്ചൻ മൊമന്റ്' എന്ന മനോഹരമായ അടിക്കുറിപ്പോടെയാണ് താരം ചിത്രങ്ങൾ പോസ്റ്റ് ചെയ്തത്. താരസം​ഘടനയായ 'അമ്മ'യുടെ ജനറൽ ബോ‍ഡി മീറ്റിങ്ങിനിടെ എടുത്ത ചിത്രങ്ങളാണ് വിന്ദുജ പങ്കുവച്ചിരിക്കുന്നത്. 'പവിത്രം' സിനിമയിലെ ഡയലോ​ഗുകളും ​ഗാനങ്ങളുമൊക്കെ നിരവധി പേർ കമന്റ് ബോക്സിൽ പങ്കുവച്ചിട്ടുണ്ട്.

മോഹൻലാലിനും വിന്ദുജയ്ക്കുമൊപ്പം ശോഭന, തിലകൻ, ശ്രീവിദ്യ, കെപിഎസ്‌സി ലളിത തുടങ്ങിയവരും പവിത്രത്തിൽ പ്രധാന വേഷങ്ങളിലെത്തിയിരുന്നു. ശരത് ആണ് ചിത്രത്തിന് സം​ഗീതമൊരുക്കിയിരിക്കുന്നത്. സന്തോഷ് ശിവനായിരുന്നു ഛായാ​ഗ്രഹണം. ചിത്രത്തിലെ പാട്ടുകളും ഹിറ്റായി മാറിയിരുന്നു.