Doomsday Pinterest
Entertainment

'സ്പൈഡർമാന്റെ' റെക്കോർഡ് തകർക്കുമോ 'ഡൂംസ്‌ഡേ'? അഡ്വാൻസ് ബുക്കിങ്ങിൽ കുതിപ്പ്; ആദ്യ മണിക്കൂറിൽ വിറ്റത് 50,000 ടിക്കറ്റുകൾ

രാജ്യത്തുടനീളം ഏകദേശം 500 ഷോകളിലാണ് അഡ്വാൻസ് ബുക്കിങ് ആരംഭിച്ചിരിക്കുന്നത്.

Author : സമകാലിക മലയാളം ഡെസ്ക്

റിലീസിന് ഒരു മാസം ബാക്കിനിൽക്കെ ഇന്ത്യയിൽ അഡ്വാൻസ് ബുക്കിങ്ങിൽ വൻ പ്രതികരണം നേടി മാർവൽ ചിത്രം 'അവഞ്ചേഴ്സ്: ഡൂംസ്‌ഡേ'. ബുക്കിങ് ആരംഭിച്ച് മണിക്കൂറുകൾക്കുള്ളിൽ 50,000 ടിക്കറ്റുകളാണ് വിറ്റുപോയത്.

ഇതിലൂടെ മൂന്ന് കോടിയിലധികം രൂപയുടെ ഗ്രോസ് കളക്ഷനും ചിത്രം സ്വന്തമാക്കിയെന്നാണ് റിപ്പോർട്ടുകൾ. ഡിസംബർ 17നാണ് ചിത്രം ഇന്ത്യൻ തിയേറ്ററുകളിലെത്തുന്നത്.

നിലവിൽ രാജ്യത്തുടനീളം ഏകദേശം 500 ഷോകളിലാണ് അഡ്വാൻസ് ബുക്കിങ് ആരംഭിച്ചിരിക്കുന്നത്. ഇതിൽ ഭൂരിഭാഗം ടിക്കറ്റുകളും വിറ്റുപോയത് ദേശീയ മൾട്ടിപ്ലെക്സ് ശൃംഖലകളിലൂടെയാണ്. ദക്ഷിണേന്ത്യയിലെ സ്വതന്ത്ര തിയേറ്ററുകളിലും ബുക്കിങ് ആരംഭിച്ചിട്ടുണ്ട്. റിലീസിന് 30 ദിവസം ശേഷിക്കെയാണ് ഈ പ്രതികരണം ലഭിക്കുന്നത്.

നിലവിൽ ഇൻഫിനിറ്റി വിഷൻ (Infinity Vision) സർട്ടിഫൈഡ് സ്ക്രീനുകളിലാണ് ബുക്കിങ് ആരംഭിച്ചിരിക്കുന്നത്. PXL, 4DX, Dolby തുടങ്ങിയ പ്രീമിയം ഫോർമാറ്റുകളിലേക്കുള്ള ബുക്കിങ് ഇതുവരെ തുറന്നിട്ടില്ല. ആദ്യഘട്ടത്തിൽ ലഭ്യമായ സ്ക്രീനുകളിലെ ടിക്കറ്റുകൾ വിറ്റുതീർത്തശേഷം കൂടുതൽ ഫോർമാറ്റുകളിലേക്ക് ബുക്കിങ് വ്യാപിപ്പിക്കാനാണ് നീക്കമെന്ന് റിപ്പോർട്ടുകളുണ്ട്.

ഇന്ത്യയിൽ ഈ വർഷം പുറത്തിറങ്ങിയ 'സ്പൈഡർ മാൻ: ബ്രാൻഡ് ന്യൂ ഡേ'യുടെ പേരിലാണ് നിലവിൽ ഏറ്റവും ഉയർന്ന ഹോളിവുഡ് ഓപ്പണിങ് റെക്കോർഡ്. റിലീസ് ദിനത്തിൽ 79 കോടി രൂപയാണ് ചിത്രം നേടിയതെന്നാണ് കണക്ക്. ഒരു ദിവസം ഹോളിവുഡ് ചിത്രം നേടിയ ഏറ്റവും ഉയർന്ന കളക്ഷനും ഇതേ ചിത്രത്തിന്റെ ആദ്യ ഞായറാഴ്ചയിലേതാണ്. 100 കോടി രൂപയ്ക്ക് തൊട്ടടുത്താണ് ഈ നേട്ടം.

'അവഞ്ചേഴ്സ്: ഡൂംസ്‌ഡേ'യുടെ നിലവിലെ അഡ്വാൻസ് ബുക്കിങ് ട്രെൻഡ് തുടർന്നാൽ ഈ റെക്കോർഡുകൾ മറികടക്കാൻ ചിത്രത്തിന് കഴിയുമെന്നാണ് ബോക്സ് ഓഫീസ് നിരീക്ഷകരുടെ വിലയിരുത്തൽ. എന്നാൽ ലഭ്യമായ കണക്കുകൾ ആദ്യഘട്ട ബുക്കിങ്ങിന്റേതാണ്. കൂടുതൽ തിയേറ്ററുകളിലും ഭാഷകളിലും ബുക്കിങ് ആരംഭിക്കുന്നതോടെ മാത്രമേ ചിത്രത്തിന്റെ യഥാർഥ ബോക്സ് ഓഫീസ് സാധ്യത വ്യക്തമാകൂ.

ആന്റണി റൂസ്സോ, ജോ റൂസ്സോ എന്നിവർ സംവിധാനം ചെയ്യുന്ന ചിത്രത്തിൽ റോബർട്ട് ഡൗണി ജൂനിയർ ഡോക്ടർ ഡൂമായി എത്തുന്നു. ക്രിസ് ഇവാൻസ്, ക്രിസ് ഹെംസ്വർത്ത്, പെഡ്രോ പാസ്കൽ, ഫ്ലോറൻസ് പ്യൂ, പോൾ റഡ്, വനേസ കിർബി തുടങ്ങിയ വൻ താരനിരയും ചിത്രത്തിലുണ്ട്. ഡിസംബർ 17ന് ഇന്ത്യയിൽ റിലീസ് ചെയ്യുന്ന ചിത്രം ഡിസംബർ 18നാണ് അമേരിക്കയിൽ തിയേറ്ററുകളിലെത്തുന്നത്.

Will 'Doomsday' break 'Spider-Man's' record? Surge in advance bookings; 50,000 tickets sold in the first hour

ആ നിർദേശം വച്ചത് സർക്കാർ; കാറ്റാടി വൈദ്യുതി വിവാദത്തിൽ പുതിയ വഴിത്തിരിവ്

'ഇരമ്പിപ്പായാന്‍' ഇനി ഇല്ല; പള്‍സര്‍ 180 മോഡല്‍ നിര്‍ത്തി ബജാജ്!

ഓറഞ്ചിന്റെ തൊലികൊണ്ട് മധുരമൂറുന്ന മിഠായി, കൃത്രിമ ചേരുവകളില്ലാതെ വീട്ടിൽ ഉണ്ടാക്കാം

കെടിഡിസി ചെയര്‍മാന്‍ സ്ഥാനം വേണം: മുഖ്യമന്ത്രിക്ക് പി വി അന്‍വറിന്റെ കത്ത്

ആരാകും ബോണ്ട് ​ഗേൾ? റോബർട്ട് പാറ്റിൻസണിന്റെ നായികയാകാൻ സെൻഡയയും മാർഗരറ്റ് ക്വാളിയും?