ലോക്ക്ഡൗണിനിടെ പഴയ ഓർമ്മകൾ ഒരിക്കൽ കൂടെ ആരാധകരുമായി പങ്കുവച്ച് സന്തോഷം കണ്ടെത്തുകയാണ് താരങ്ങളിൽ പലരും. പഴയ സിനിമ ഓർമ്മകളും സൗഹൃദത്തിന്റെ ചിത്രങ്ങളുമൊക്കെ പങ്കുവച്ചാണ് ഇവർ പോയനാളുകൾ വീണ്ടും ഓർത്തെടുക്കുന്നത്. ഇപ്പോഴിതാ നീലത്താമര എന്ന ചിത്രത്തിലെ ഒരു ചെറിയ ഓർമ്മയിലേക്കാണ് നടി റിമ കല്ലിങ്കൽ എത്തിയിരിക്കുന്നത് . 

സിനിമയിൽ തനിക്കൊപ്പം അഭിനയിച്ച സംവൃത സുനിൽ, അർച്ചനാ കവി എന്നിവർക്കൊപ്പം ഒരു പാടവരമ്പത്ത് കൂടി നടക്കുന്ന ചിത്രമാണ് താരം പങ്കുവച്ചത്. ഷൂട്ടിങ്ങിനിടെ പകർത്തിയ ചിത്രമാണ് ഇത്. ചിത്രത്തിൽ സംവൃതയെ കാണാൻ എന്ത് സുന്തരിയാണ് എന്ന അർച്ചനയോട് ചോദിച്ചുകൊണ്ടാണ് റിമ ക്യാപ്ഷൻ കുറിച്ചിരിക്കുന്നത്.  “നമ്മളൊക്കെ കഷ്ടപ്പെട്ട് നടക്കാൻ ശ്രമിക്കുമ്പോൾ ഈ സംവൃതയ്ക്ക് എന്തൊരു ​ഗ്രേസ് ആണ്,” റിമ കുറിച്ചു.

എംടി വാസുദേവൻ നായർ എഴുതി ലാൽ ജോസ് സംവിധാനം ചെയ്ത ചലച്ചിത്രമാണ് നീലത്താമര. 1979 ഇതേ പേരിൽ പുറത്തിറങ്ങിയ ചിത്രത്തിന്റെ പുനരാവിഷ്കരണമാണ് ഈ ചിത്രം. അർച്ചന കവി ചിത്രത്തിലെ കുഞ്ഞിമാളു എന്ന മുഖ്യ കഥാപാത്രത്തെ അവതരിപ്പിച്ചപ്പോൾ കൈലാഷ് ആണ് നായകനായി എത്തിയത്. 

റിമ ആദ്യമായി അഭിനയിച്ച ഋതു എന്ന ചിത്രത്തിലെ ഒരു ത്രോബാക്ക് ഫോട്ടോയും കഴിഞ്ഞ ദിവസം പങ്കുവച്ചിരുന്നു. ആസിഫ് അലി, ശ്യാമപ്രസാദ്, നിഷാൻ എന്നിവർക്കൊപ്പമുള്ള ചിത്രമായിരുന്നു അത്.