വീട്ടിലിരുന്ന് നാടനൻ വിഭവങ്ങൾ പരീക്ഷിക്കുന്ന തിരക്കിലാണ് നടൻ ബിനീഷ് ബാസ്റ്റിൻ. ഇതിനോടകം നിരവധി രുചികളാണ് താരം ആരാധകരുമായി പങ്കുവെച്ചത്. ഇപ്പോൾ ഇതാ മറ്റൊരു വെറൈറ്റി ഐറ്റവുമായി എത്തിയിരിക്കുകയാണ് ബിനീഷ്. കൊപ്രയും ശർക്കരയും കൊണ്ട് വളരെ സിംപിളായി ഉണ്ടാക്കാവുന്ന വിഭവമാണിത്. 

കൊപ്രയിൽ ശർക്കര നിറച്ച് ചുട്ടെടുക്കുകയാണ് ബിനീഷ്. ഫേയ്സ്ബുക്കിൽ പങ്കുവെച്ച വിഡിയോയിലൂടെയാണ് താരം നാടൻ രുചി പരിചയപ്പെടുത്തിയത്. ഇതിനായി ആദ്യം ഉണങ്ങിയ തേങ്ങ പൊതിച്ച് ചിരട്ട മാറ്റിയെടുക്കണം. തുടർന്ന് കൊപ്രയുടെ മുകൾ ഭാ​ഗം മുറിച്ചുമാറ്റി ഉരലിൽ പൊടിച്ചെടുത്ത ശർക്കര അതിൽ നിറയ്ക്കണം. ബൈൻഡിങ് വയർ മുറുക്കി നീട്ടി ചുറ്റി എടുക്കണം. ഇത് തീയിൽ ചുട്ട് എടുക്കണം.

ചകരിയും ചിരട്ടയും കർപ്പൂരവും ഇട്ട് തീ പിടിപ്പിച്ച് അതിന് മുകളിൽ ഈ ശർക്കര നിറച്ച കൊപ്ര കെട്ടി തൂക്കി ചുട്ട് എടുക്കാം. മണ്ണെണ്ണ ഒഴിച്ച് തീപിടിപ്പിക്കരുതെന്നും താരം പറയുന്നുണ്ട്. വാട്ടി എടുത്ത വാഴയിലയിൽവെച്ച് ചുട്ടെടുത്ത കൊപ്ര മുറിച്ച് ശർക്കരയും ചേർത്ത് കഴിക്കണം. പറഞ്ഞറിയിക്കാൻ പറ്റാത്ത രുചിയാണ് എന്നാണ് ബിനീഷ് പറയുന്നത്.