മുംബൈ: വിവാദങ്ങള്‍ രാഖി സാവന്തിന് പുത്തരിയൊന്നുമല്ല. ഇത്തവണ പാക് പതാകയുടെ രൂപത്തിലാണ് രാഖിയെ തേടി ട്രോളുകളും ഭീഷണി സന്ദേശങ്ങളും എത്തിയതെന്ന് മാത്രം. പുതിയ സിനിമയായ 'ദാര 370' കോസ്റ്റിയൂമിലുള്ള ചിത്രമാണ് രാഖി ഇന്‍സ്റ്റയില്‍ പങ്കുവച്ചത്. പാക് പതാക പുതച്ച് നില്‍ക്കുന്ന ഫോട്ടോയ്ക്ക് താഴെ ,' ഐ ലവ് മൈ ഇന്ത്യ, പക്ഷേ പുതിയ സിനിമയ്ക്കായുള്ള വേഷമാണിത് '  എന്നും താരം കുറിച്ചിരുന്നു. 

ചിത്രം പോസ്റ്റ്‌ ചെയ്ത് നിമിഷങ്ങള്‍ക്കുള്ളില്‍ അണ്‍ഫോളോ ചെയ്ത് പോകുമെന്ന് വരെ ആരാധകര്‍ ഭീഷണിപ്പെടുത്തി. മറ്റ് ചിലര്‍ രാഖിയുടെ പേര് 'രാഖി പാകിസ്ഥാനി സാവന്ത്' എന്ന് പരിഷ്‌കരിച്ചു. ഇനിയിപ്പോള്‍ പാകിസ്ഥാന്‍ പൗരത്വം കിട്ടാനും എളുപ്പമാണെന്നും കമന്റുകള്‍ വന്നു. 

കാര്യങ്ങള്‍ കൈവിട്ടു പോകുമെന്ന് ആയതോടെ വിഡിയോ വിശദീകരണവുമായി രാഖി എത്തി. ചിത്രത്തില്‍ താന്‍ പാകിസ്ഥാനി പെണ്‍കുട്ടിയുടെ വേഷത്തിലാണ് എത്തുന്നത്. പാകിസ്ഥാനിലെ ആളുകള്‍ എല്ലാവരും മോശക്കാരല്ലെന്നും തനിക്ക് അവരോട് സ്‌നേഹമുണ്ടെന്നും അവര്‍ പറഞ്ഞു. വളരെ കുറച്ച് ആളുകളാണ് ജിഹാദികളായി പ്രശ്‌നമുണ്ടാക്കാന്‍ നടക്കുന്നതെന്നും രാഖി പറഞ്ഞു. എന്തായാലും ആരാധകര്‍ ഇടഞ്ഞ മട്ടില്‍ തന്നെയാണ്. നല്ല ദേഷ്യം വരുന്നുണ്ടെന്നും ഇനി ഇതുപോലെ കോലം കെട്ടരുതെന്നും ആരാധകര്‍ കമന്റ് ചെയ്യുന്നുണ്ട്.