ആരാധകരുടെ കാത്തിരിപ്പിന് വിരാമമിട്ട് ഇംത്യാസ് അലി ചിത്രത്തിലൂടെ സാറ അലിഖാനും കാര്‍ത്തിക ആര്യനും ബിഗ് സ്‌ക്രീനില്‍ ഒന്നിക്കുകയാണ്. ഇരുവരും ഒന്നിച്ചുള്ള ആദ്യ ചിത്രമായ ലൗ ആജ് കല്‍ 2ന്റെ ട്രെയിലര്‍ പുറത്തുവിട്ടു. ആരാധകരെ ആവേശത്തിലാക്കിയ ഗംഭീര പോസ്റ്ററിന് പിന്നാലെയാണ് ഇപ്പോള്‍ ട്രെയിലറും എത്തിയിരിക്കുന്നത്. 

ഒരു മുഴുനീള പ്രണയ ചിത്രമായിരിക്കും ലവ് ആജ് കല്‍ എന്നാണ് ട്രെയിലര്‍ നല്‍കുന്ന സൂചന. കരിയര്‍ വിജയം ലക്ഷ്യമിട്ട് മുന്നേറുന്ന സോ എന്ന കഥാപാത്രമായാണ് സാറ ചിത്രത്തില്‍. കാര്‍ത്തിക് ആര്യനാകട്ടെ റൊമാന്റിക് ബോയ് വീര്‍ ആയാണ് എത്തുന്നത്. രണ്ട് കാലഘട്ടത്തിലെ പ്രണയമാണ് ചിത്രം പറയുന്നതെന്നാണ് ട്രെയിലറില്‍ നിന്ന് വ്യക്തമാകുന്നത്. 1990ലെയും 2020ലെയും പ്രണയം. പ്രണയദിനമായ ഫെബ്രുവരി 14നാണ് ചിത്രത്തിന്റെ റിലീസും. 

2009ല്‍ പുറത്തിറങ്ങിയ ഇതേ പേരിലുള്ള ഇംത്യാസ് അലി ചിത്രത്തിന്റെ രണ്ടാം ഭാഗമാണ് ഇതെന്നാണ് റിപ്പോര്‍ട്ടുകള്‍. ആദ്യ ഭാഗത്തില്‍ ദീപിക പദുക്കോണും സെയിഫ് അലി ഖാനുമാണ് അഭിനയിച്ചത്.