എബ്രിഡ് ഷൈന്‍ സംവിധാനം ചെയ്ത കുങ് ഫൂ മാസ്റ്ററിലൂടെ മലയാളത്തിന്റെ ആക്ഷന്‍ ക്വീനായിരിക്കുകയാണ് നിത പിള്ള. ഇപ്പോള്‍ വൈറലാകുന്നത് വ്യവസായി ബോബി ചെമ്മണ്ണൂരുമായി നിത നടത്തുന്ന കുങ് ഫൂ ഫൈറ്റാണ്. എറണാകുളം പ്രസ് ക്ലബ്ബിന്റെ ഫാമിലി മീറ്റ് വേദിയിലാണ് ഇരുവരുടേയും സൗഹൃദപോരാട്ടം നടന്നത്.

ബേബി ചെമ്മണ്ണൂരിനെ ഉശിരോടെ ചാടി ചവിട്ടുന്ന നിത പിള്ളയെയാണ് വിഡിയോയില്‍ കാണുന്നത്. കുങ്ഫു, കരാട്ടെ, കളരി തുടങ്ങിയ ആയോധന കലകള്‍ അഭ്യസിക്കുന്ന വ്യക്തിയാണ് ബോബി ചെമ്മണ്ണൂര്‍. കുങ് ഫൂ മാസ്റ്റര്‍ സിനിമയിലെ വില്ലനായി അഭിനയിച്ച സോണറ്റുമായാണ് ബോബി ചെമ്മണ്ണൂര്‍ ആദ്യം ബലപരീക്ഷണം നടത്തിയത്. അമ്പരപ്പിക്കുന്ന പ്രകടനമാണ് ബോബി നടത്തിയത്.

ഷൈജു ദാമോദരന്റെ കമന്ററി കൂടി ആയതോടെ പോരാട്ടത്തിന്റെ ഉശിരും കൂടി. ആര്‍പ്പുവിളികളോടെയാണ് കാഴ്ചക്കാര്‍ പോരാട്ടം കണ്ടത്. കുങ് ഫു മാസ്റ്ററില്‍ അഭിനയിക്കാനായി ഒരു വര്‍ഷത്തോളം നീണ്ട ട്രെയിനിങ്ങാണ് നിത എടുത്തത്. സിനിമയിലേതു പോലെ ബോബി ചെമ്മണ്ണൂരുമായി പോരാടി ഞെട്ടിച്ചിരിക്കുകയാണ് താരം. എബ്രിഡ് ഷൈന്‍ സംവിധാനം ചെയ്ത പൂമരത്തിലൂടെയാണ് നിത സിനിമയിലേക്ക് അരങ്ങേറുന്നത്. മികച്ച അഭിപ്രായം നേടി മുന്നേറുകയാണ് ചിത്രം.