മലയാള സിനിമയില്‍ കാസ്റ്റിംഗ് കൗച്ച് പുതുമയുള്ള കാര്യമല്ലെന്ന് നടന്‍ മധു. മലയാളത്തില്‍ മാത്രമല്ല, എല്ലാഭാഷയിലെയും സിനിമാരംഗത്ത് കാസ്റ്റിംഗ് കൗച്ച് എന്ന സമ്പ്രദായം ഉള്ളതാണെന്നാണ് മധുവിന്റെ വാദം. ഒരു സ്വകാര്യ ടെലിവിഷന്‍ ചാനലിലെ അഭിമുഖത്തില്‍ സംസാരിക്കുന്നതിനിടക്കാണ് മധുവിന്റെ വിവാദപരമായ പരാമര്‍ശം. 

'ലൈംഗികതാല്‍പര്യത്തോടെയുള്ള ഇത്തരം ബന്ധങ്ങള്‍ സിനിമയില്‍ മാത്രമല്ല, എല്ലാ മേഖലയിലുമുള്ളതാണ്. എല്ലാ സമൂഹത്തിലുമുണ്ടാകും. എന്നാല്‍ അത് ആ സമൂഹത്തിന്റെ മുഴുവന്‍ സ്വഭാവമല്ലല്ലോ. അടുപ്പമുള്ളവരുമായി ഇത്തരം ബന്ധം കൂടുതല്‍ സാധ്യമായതിനാല്‍ അത് നടന്നിരുന്നു'- മധു പറഞ്ഞു.

നടി ആക്രമിക്കപ്പെട്ട സംഭവത്തെക്കുറിച്ച് കൃത്യമായ വിവരങ്ങളൊന്നും തനിക്കറിയാത്തതിനാലാണ് അതേക്കുറിച്ച് അഭിപ്രായം പറയാത്തതെന്നും മധു പറയുന്നു. ദിലീപാണ് അത് ആസൂത്രണം ചെയ്തതെന്ന് കരുതുന്നില്ല. കാരണം ദിലീപ് ബുദ്ധിമാനാണ്. ഇത്തരത്തിലുള്ള ഒരു വിഡ്ഢിത്തം ദിലീപ് കാണിക്കുമെന്ന് കരുതുന്നില്ലെന്നും മധു പറയുന്നു.