ലോക്ക്ഡൗണിൽ ബ്യൂട്ടിപാർലറുകളും സലൂണുകളെല്ലാം അടിച്ചതോടെ സ്വന്തമായി പുത്തൻ ലുക്ക് പരീക്ഷിച്ചവർ നിരവധിയാണ്. ഇപ്പോൾ ശ്രദ്ധ നേടുന്നത് ഒരുകാലത്ത് മലയാളികളുടെ ഇഷ്ടതാരമായിരുന്ന നടി ജ്യോതിർമയിയുടെ പുതിയ ലുക്കാണ്. തലമുടി മൊട്ടയടിച്ചിരിക്കുകയാണ് ജ്യോതിർമയി. താരത്തിന്റെ ഭർത്താവും സംവിധായകനുമായ അമൽ നീരദാണ് ജ്യോതിർമയിയുടെ ചിത്രം പങ്കുവെച്ചത്. 

സ്വകാര്യ ജീവിതത്തിലെ വിശേഷങ്ങൾ സോഷ്യൽ മീഡിയയിലൂടെ പങ്കുവെക്കാത്ത താരജോഡികളാണ് അമൽ നീരദും ജ്യോതിർമയിയും. അതിനാൽ അപ്രതീക്ഷിതമായി ജ്യോതിർമയിയുടെ ചിത്രം കണ്ടതോടെ ആരാധകർ അമ്പരന്നിരിക്കുകയാണ്. ‘തമസോമ ജ്യോതിർഗമയ’ എന്ന അടിക്കുറിപ്പോടെയാണ് ചിത്രം പങ്കുവെച്ചിരിക്കുന്നത്. 

മികച്ച പ്രതികരണമാണ് ജ്യോതിർമയിയുടെ ചിത്രത്തിന് ലഭിക്കുന്നത്. മൊട്ടയടിച്ചപ്പോൾ ബോൾഡ് ലുക്കായി എന്നാണ് ഒരാളുടെ കമന്റ്. ഈ ലുക്കിൽ ജ്യോതിർമയിക്ക് ബിലാൽ 2 ൽ ഒരു അവസരം നൽകാൻ ആവശ്യപ്പെടുന്നവരുമുണ്ട്. കൂടാതെ ബിലാലിലെ വിശേഷങ്ങൾ അറിയാനാണ് ആരാധകർക്ക് താൽപ്പര്യം കൂടുതൽ. വരത്തൻ ആണ് അമൽ ഒടുവിൽ സംവിധാനം ചെയ്ത ചിത്രം.