ആലപ്പുഴ: പ്രായത്തെ തോല്‍പ്പിച്ച് സാക്ഷരതാ പരീക്ഷയില്‍ മിന്നുന്ന ജയം നേടിയ കാര്‍ത്യായനി അമ്മയെ കാണാന്‍ നടി മഞ്ജു വാരിയര്‍ എത്തി. ചേര്‍ത്തുപിടിച്ച് സെല്‍ഫിയെടുക്കുകയും മുത്തശ്ശിക്ക് മുണ്ടുംനേര്യതും സമ്മാനമായി നല്‍കുകയും ചെയ്തു മഞ്ജു വാരിയര്‍. തുടര്‍ന്ന് കാര്‍ത്യായനി അമ്മയെ പൊന്നാടയണിയിച്ച് കേക്ക് മുറിച്ച് ആഘോഷിച്ച ശേഷമാണ് മഞ്ജു വാരിയര്‍ മടങ്ങിയത്.
സെല്‍ഫിയെടുത്ത ശേഷം മഞ്ജു കാര്‍ത്യായനിയമ്മയോടു ചോദിച്ചു: 'ഇനിയെന്താണ് ആഗ്രഹം?'കംപ്യൂട്ടര്‍ പഠിക്കണം.'സിനിമയില്‍ അഭിനയിക്കുന്നോ?'തൊഴുകൈയോടെ മറുപടി: വേണ്ട. പഠിക്കാനാണിഷ്ടം.ചുറ്റും നിന്നവരുടെ പൊട്ടിച്ചിരിയില്‍ കാര്‍ത്യായനി അമ്മയും കൂടി.97-ാം വയസ്സില്‍ അക്ഷരലക്ഷം പരീക്ഷയില്‍ ഗംഭീര ജയം നേടി കാര്‍ത്യായനി അമ്മ വാര്‍ത്തങ്ങളില്‍ നിറഞ്ഞിരുന്നു. താരമായപ്പോള്‍ അവരെ കാണണമെന്ന ആഗ്രഹം സാക്ഷരതാ മിഷന്‍ അംബാസഡറായ മഞ്ജു ഫെയ്‌സ്ബുക്കില്‍ കുറിച്ചിരുന്നു.
ഇന്നലെ രാവിലെ അതിന് സന്ദര്‍ഭമൊരുങ്ങി.സന്തോഷ് ശിവന്റെ 'ജാക്ക് ആന്‍ഡ് ജില്‍' എന്ന ചിത്രത്തിന്റെ ഷൂട്ടിനായി ഹരിപ്പാട്ടുണ്ടായിരുന്നു മഞ്ജു. ക്രയോണ്‍സ് ഫൗണ്ടേഷന്‍ എന്ന സാമൂഹിക സംഘടനയുടെ പ്രവര്‍ത്തകരാണ് രണ്ടു 'താരങ്ങളുടെ' സംഗമത്തിനു വഴിയൊരുക്കിയത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates