ദുബൈ: ഐ ഫോൺ 17 വളരെ ലാഭകരമായി എവിടെ നിന്ന് സ്വന്തമാക്കാൻ കഴിയുക? ഇന്ത്യയിൽ നിന്നോ അതോ യു എ ഇയിൽ നിന്നോ ? ഈ കൺഫ്യൂഷൻ ഇനി വേണ്ട. ഐ ഫോൺ 17 ന്റെ വില ഔദ്യോഗികമായി കമ്പനി പുറത്തിറക്കി. ഇരു രാജ്യങ്ങളിലെയും വില പരിശോധിക്കാം.

ഐഫോൺ 17, ഐ ഫോൺ 17 പ്രൊ , ഐ ഫോൺ 17 പ്രൊ മാക്സ്, ഐ ഫോൺ എയർ എന്നീ മോഡലുകളാണ് ഏറ്റവും പുതിയതായി കമ്പനി പുറത്തിറക്കിയിരിക്കുന്നത്. ആപ്പിളിന്റെ ഇതുവരെയുള്ളതില്‍ വച്ച് ഏറ്റവും കനം കുറഞ്ഞ ഐഫോണാണ് ഐഫോണ്‍ 17 എയര്‍ സീരീസ്. 5.6 മില്ലിമീറ്റര്‍ കനമുള്ള, ഇ-സിമ്മുകള്‍ സപ്പോര്‍ട്ട് ചെയ്യുന്ന മോഡലാണിത്. പുതിയ മോഡൽ സ്വന്തമാക്കാൻ ആയി പ്രീ ബുക്കിങ്ങും ആരംഭിച്ചിട്ടുണ്ട്.

ഐഫോൺ 17 ഇന്ത്യയിൽ നിന്ന് വാങ്ങാൻ നൽകേണ്ടത് 82,900 രൂപയാണ്. യു എ ഇയിലെ വില 81,700 രൂപ( 3,399 ദിർഹം)യാണ്. അതായത് 1200 രൂപ മാത്രമാകും വിലക്കുറവ്. ഐഫോൺ എയറിന്റെ ഇന്ത്യൻ വില 119,900 രൂപയാണ്. യു എ ഇയിൽ 103,300 രൂപ (4,299 ദിർഹം) യാണ് നൽകിയാൽ ഫോൺ സ്വന്തമാക്കാം. അതായത് 16,600 രൂപയുടെ കുറവ്.

ഇനി ഐഫോൺ 17 പ്രൊ വാങ്ങാനാണ് നിങ്ങൾക്ക് ആഗ്രഹം ആണെങ്കിൽ ഇന്ത്യയിൽ  134,900 രൂപ നൽകണം. എന്നാൽ യു എ ഇയിൽ 4,699 ദിർഹം(113,000 രൂപ) നൽകിയാൽ മതി. അതായത് 21,900 രൂപ ലാഭം.

ഐ ഫോൺ 17 പ്രൊ മാക്സ് ആണ് നിങ്ങൾ വാങ്ങാൻ ആഗ്രഹിക്കുന്നത് എങ്കിൽ ഇന്ത്യയിൽ 149,900 രൂപ നൽകേണ്ടി വരും. എന്നാൽ യു എ ഇയിൽ 122,500 രൂപ (5,099 ദിനാർ) നൽകിയാൽ പ്രൊ മാക്സ് ഫോൺ സ്വന്തമാക്കാം. അതായത് ഇന്ത്യയുടെ വിലയേക്കാൾ 21,900 രൂപ കുറവ്. ഇന്ത്യയിൽ ഐ ഫോൺ 17 ന്റെ ബേസ് മോഡൽ ഒഴികെയുള്ളവയുടെ വിലയിൽ മാത്രമാണ് യു എ ഇയിലേക്കാൾ വലിയ വ്യത്യാസമുള്ളത്. അത് കൊണ്ട് തന്നെ പ്രൊ വെരിയന്റുകൾ വാങ്ങാൻ യു എ ഇ തന്നെയാകും ലാഭം.

ഈ രണ്ട് രാജ്യങ്ങളിലേക്കാൾ ഐ ഫോൺ 17ന് വിലക്കുറവുള്ള മറ്റൊരു രാജ്യമുണ്ട്. അത് അമേരിക്കയാണ്. ഓരോ മോഡലിനും 15000 മുതൽ 45000 രൂപ വരെ വിലക്കുറവാണ് യു എസ് എയിൽ.