ദുബായ്: ഈ വര്‍ഷത്തെ ബലിപ്പെരുന്നാള്‍ (ഈദുല്‍ അദ്ഹ) പ്രമാണിച്ച് ദുബായിലെ സര്‍ക്കാര്‍ വകുപ്പുകള്‍ക്കും സ്ഥാപനങ്ങള്‍ക്കും ദീര്‍ഘമായ അവധി പ്രഖ്യാപിച്ചു. ദുബായ് ഗവണ്‍മെന്റ് ഹ്യൂമന്‍ റിസോഴ്സ് ഡിപ്പാര്‍ട്ട്മെന്റ് പുറത്തിറക്കിയ ഉത്തരവ് പ്രകാരം, ഹിജ്‌റ വര്‍ഷം 1447ലെ പെരുന്നാള്‍ അവധി ഈ മാസം 25 ന് ആരംഭിച്ച് 29 ന് അവസാനിക്കും. ശനി, ഞായര്‍ ദിവസങ്ങളിലെ വാരാന്ത്യ അവധിക്കുശേഷം ജൂണ്‍ ഒന്നിന് സര്‍ക്കാര്‍ ഓഫിസുകള്‍ വീണ്ടും തുറന്ന് പ്രവര്‍ത്തിക്കും.

ഷിഫ്റ്റ് അടിസ്ഥാനത്തില്‍ പ്രവര്‍ത്തിക്കുന്ന സ്ഥാപനങ്ങള്‍ക്കും ഉപയോക്തൃ സേവന കേന്ദ്രങ്ങള്‍ക്കും പൊതുസേവന സൗകര്യങ്ങള്‍ നല്‍കുന്ന വകുപ്പുകള്‍ക്കും തങ്ങളുടെ പ്രവര്‍ത്തന ആവശ്യങ്ങള്‍ക്കനുസരിച്ച് ജോലി സമയം ക്രമീകരിക്കാന്‍ അനുവാദമുണ്ട്. ദുബായിലെ സ്വകാര്യ വിദ്യാഭ്യാസ സ്ഥാപനങ്ങള്‍ക്ക് പെരുന്നാള്‍ പ്രമാണിച്ച് മെയ് 25 തിങ്കളാഴ്ച മുതല്‍ മെയ് 29 വെള്ളിയാഴ്ച വരെയാണ് അവധി പ്രഖ്യാപിച്ചിട്ടുണ്ട്.