അബുദാബി: സർവീസ് റോഡുകളിൽ നിന്ന് പ്രധാന റോഡുകളിലേക്ക് പ്രവേശിക്കുമ്പോൾ ഡ്രൈവർമാർ പ്രത്യേക ശ്രദ്ധ പുലർത്തണമെന്ന് അബുദാബി പൊലീസ്. വാഹനങ്ങൾ മെയിൻ റോഡിലേക്കും പ്രവേശിക്കും മുൻപ് ചുറ്റുപാടും നോക്കി മറ്റ് വാഹനങ്ങൾ വരുന്നില്ല എന്ന് ഉറപ്പു വരുത്തണം. അടുത്തിടെ ഉണ്ടായ അപകടത്തിന്റെ ദൃശ്യങ്ങൾ പങ്കു വെച്ചാണ് പൊലീസ് ഇക്കാര്യങ്ങൾ അറിയിച്ചത്.

പ്രധാന റോഡിലേക്ക് പ്രവേശിക്കാൻ ശ്രമിക്കുമ്പോൾ വാഹനത്തിന്റെ വേഗത കുറയ്ക്കണം. സൈഡ് ഇൻഡിക്കേറ്റർ സിഗ്നൽ ഉപയോഗിച്ച് പിന്നാലെ വരുന്ന വാഹനങ്ങൾക്ക് മുന്നറിയിപ്പ് നൽകണം. തൊട്ടു മുന്നിൽ മറ്റു വാഹനങ്ങൾ ഉണ്ടെങ്കിൽ വേഗത കുറച്ച് കാത്തു നിൽക്കുക. പ്രധാന റോഡിലൂടെ വരുന്ന വാഹനങ്ങൾക്ക് മുൻഗണന നൽണം. മെയിൻ റോഡിലൂടെ വാഹനങ്ങൾ വരുന്നില്ല എന്ന് ഉറപ്പാക്കിയതിനു ശേഷമേ വാഹനം റോഡിലേക്ക് ഇറക്കാൻ പാടുള്ളു എന്നും അബുദാബി പൊലീസ് അറിയിച്ചു.

ഈ നിയമങ്ങൾ പാലിക്കാത്തവർക്ക് 400 ദിർഹം പിഴയും ഡ്രൈവിംഗ് ലൈസൻസിൽ നാല് ബ്ലാക്ക് പോയിന്റുകളും ചുമത്തുമെന്നും അധികൃതർ മുന്നറിയിപ്പ് നൽകി. റോഡ് സുരക്ഷ ഉറപ്പാക്കാനും അശ്രദ്ധമായി വാഹനമോടിക്കുന്നത് മൂലമുണ്ടാകുന്ന അപകടങ്ങൾ കുറയ്ക്കുന്നതിനുമായി ജനങ്ങൾ സഹകരിക്കണമെന്നും പൊലീസ് അഭ്യർത്ഥിച്ചു.