മസ്കത്ത്: ഒമാനിലെ ദു​ക​മി​ലു​ണ്ടാ​യ വാഹനാപകടത്തിന്റെ ദൃശ്യങ്ങൾ പ്രചരിപ്പിച്ചവരെ അറസ്റ്റ് ചെയ്തതായി പൊലീസ്. ഏഷ്യക്കാരായ രണ്ട് പേരെയാണ് അ​ല്‍ വു​സ്ത ഗ​വ​ര്‍ണ​റേ​റ്റിലെ പൊലീസ് അറസ്റ്റ് ചെയ്‍തത്.

ഇവർ വാഹനാപകടത്തിൽ മരിച്ചവരുടെ ദൃശ്യങ്ങൾ പകർത്തുകയും വ്യാപകമായി പ്രചരിപ്പിക്കുകയും ചെയ്തിരുന്നു. ഇതിന്റെ അടിസ്ഥാനത്തിലാണ് പ്രതികളെ അറസ്റ്റ് ചെയ്തത് എന്ന് റോയൽ ഒമാൻ പൊലീസ് അറിയിച്ചു.

പ്രതികളുടെ ഈ പ്രവർത്തി സ്വ​കാ​ര്യ​ത​, പൊ​തു മ​ര്യാ​ദ​ എന്നിവ സംബന്ധിച്ച് രാജ്യത്ത് നിലനിൽക്കുന്ന നിയമങ്ങളുടെ ലം​ഘ​ന​മാ​ണ്. ഇവർക്കെതിരെ തുടർ നടപടികൾ സ്വീകരിക്കുമെന്ന് അധികൃതർ അറിയിച്ചു. അപകടത്തിൽ മരിച്ചവരുടെ ഇ​ര​ക​ളോ​ടും അ​വ​രു​ടെ കു​ടും​ബ​ങ്ങ​ളോ​ടു​മു​ള്ള ബഹുമാനം ക​ണ​ക്കി​ലെ​ടു​ത്ത് അ​പ​ക​ട ദൃ​ശ്യ​ങ്ങ​ൾ പകർത്താനോ,പങ്ക് വെയ്ക്കാനോ പാടില്ലെന്ന് റോയൽ ഒമാൻ പൊലീസ് ഓർമ്മപ്പെടുത്തി.

കഴിഞ്ഞ ദിവസം ദുകം വിലായത്തിൽ വാഹനങ്ങൾ തമ്മിൽ കൂട്ടിയിടിച്ച് വൻ അപകടമാണ് ഉണ്ടായത്. സംഭവത്തിൽ 8 ബംഗ്ലാദേശ് സ്വദേശികളാണ് മരിച്ചിരുന്നു. വാഹനത്തിന്റെ ഡ്രൈവർ ഉൾപ്പെടെ രണ്ട് പേരുടെ നില അതീവ ഗുരുതരമായി തുടരുകയാണ്. സംഭവത്തിൽ ഒമാൻ പൊലീസ് അന്വേഷണം ആരംഭിച്ചിട്ടുണ്ട്.