ദുബൈ: ദുബൈ ഡ്യൂട്ടി ഫ്രീ മില്ലേനിയം മില്യനയര്‍ നറുക്കെടുപ്പില്‍ രണ്ടാം തവണയും ഭാഗ്യം തുണച്ച് ലെബനീസ് വ്യവസായിയെ തേടി പത്ത് കോടി രൂപ (10 ലക്ഷം ഡോളര്‍) എത്തി. ബെയ്‌റൂട്ടില്‍ നിര്‍മാണക്കമ്പനി നടത്തുന്ന ആന്റോയിന്‍ ലബാക്കി(53)യാണ് അപൂര്‍വ ഭാഗ്യവാന്‍. ദുബൈ ഡ്യൂട്ടി ഫ്രീയുടെ ചരിത്രത്തില്‍ രണ്ടു തവണ മില്ലേനിയം മില്യനയര്‍ സമ്മാനം നേടുന്ന 12-ാമത്തെ ആളാണ് ലബാക്കി.

ഇന്നലെ ദുബൈ രാജ്യാന്തര വിമാനത്താവളത്തിലാണ് നറുക്കെടുപ്പ് നടന്നത്. ഈ മാസം 17 ന് ഓണ്‍ലൈനായി വാങ്ങിയ 3360 എന്ന ടിക്കറ്റിനാണ് സമ്മാനം അടിച്ചത്. 2018 ഓഗസ്റ്റിലും ആന്റോയിന് 10 ലക്ഷം ഡോളര്‍ സമ്മാനമായി നേടിയിരുന്നു. അതിനു മുന്‍പ്, 2004 ഓഗസ്റ്റില്‍ നടന്ന ദുബൈ ഡ്യൂട്ടി ഫ്രീ ഫൈനസ്റ്റ് സര്‍പ്രൈസ് പ്രമോഷനില്‍ ഒരു ബിഎംഡബ്ല്യു കാറും ഇദ്ദേഹത്തിന് ലഭിച്ചിരുന്നു.

കഴിഞ്ഞ തവണ ലഭിച്ച 10 ലക്ഷം ഡോളര്‍ ബെയ്‌റൂട്ടിലേക്ക് മാറ്റിയിരുന്നെങ്കിലും വലിയ നേട്ടമുണ്ടായില്ലെന്ന് ഇദ്ദേഹം പറയുന്നു. ഇത്തവണ ലഭിച്ച സമ്മാനത്തുക ദുബൈയില്‍ തന്നെ നിലനിര്‍ത്താനും നിക്ഷേപിക്കാനുമാണ് തീരുമാനിച്ചതെന്ന് ആന്റോയിന്‍ ലബാക്കി പറഞ്ഞു.