കോട്ട: കടയുടെ മുന്‍വശം മാലിന്യം വലിച്ചെറിഞ്ഞതിനെ എതിര്‍ത്ത കടയുടമയെ കൈക്കോട്ട് കൊണ്ട് അടിച്ചുകൊന്നു. 68കാരനായ പദംകുമാറാണ് മരിച്ചത്. രാജസ്ഥാനിലെ കോട്ട ജില്ലയിലെ സംഗോഡ് പൊലീസ് സ്റ്റേഷന്‍ പരിധിയിലുള്ള രാജ്ഗഡില്‍ ഞായറാഴ്ച രാവിലെയാണ് സംഭവം.

തന്റെ കടയുടെ മുന്നില്‍ മാലിന്യം വലിച്ചെറിയരുതെന്ന് പദം കുമാര്‍ ജെയിന്‍ സോഹന്‍ലാല്‍ മാലിയോട് പറഞ്ഞിരുന്നതായി പൊലീസ് പറയുന്നു. കുറച്ച് സമയത്തിന് ശേഷം തിരിച്ചെത്തിയ സോഹന്‍ലാല്‍ കടയുടമയെ ആക്രമിക്കുകയായിരുന്നു. കൈയില്‍ കരുതിയ കൈക്കോട്ട് ഉപയോഗിച്ച് 68കാരന്റെ തലയ്ക്കടിയ്ക്കുകയായിരുന്നെന്ന് പൊലിസ് പറഞ്ഞു.

സാരമായി പരിക്കേറ്റ ഇയാള്‍ എംബിഎസ് ആശുപത്രിയില്‍ ചികിത്സയ്ക്കിടെയാണ് മരിച്ചത്. പോസ്റ്റ് മോര്‍ട്ടത്തിന് ശേഷം ജെയിനിന്റെ മൃതദേഹം ബന്ധുക്കള്‍ക്ക് കൈമാറി. കൊലപാതക്കുറ്റം ചുമത്തി പ്രതിക്കെതിരെ കേസ് എടുത്തതായി പൊലീസ് പറഞ്ഞു.