വിദ്യാര്‍ഥി പ്രക്ഷോഭത്തെത്തുടര്‍ന്ന് കേന്ദ്ര വിദ്യാഭ്യാസമന്ത്രി പദത്തില്‍ നിന്നും ധര്‍മേന്ദ്ര പ്രധാന്‍ രാജിവെച്ചതില്‍ പ്രതികരണവുമായി കേന്ദ്രമന്ത്രി അമിത് ഷാ. എട്ടു വര്‍ഷം മുമ്പത്തെ രാഹുല്‍ ഗാന്ധിയുടെ കുറിപ്പ് വീണ്ടും ചര്‍ച്ചയാകുന്നു. സംസ്ഥാനത്ത് മഴ വീണ്ടും സജീവമാകുന്നു. ഇന്നത്തെ 5 പ്രധാന വാര്‍ത്തകള്‍ ( Top 5 News Today ) അറിയാം.

കേന്ദ്ര വിദ്യാഭ്യാസമന്ത്രി സ്ഥാനത്തു നിന്നുമുള്ള ധര്‍മേന്ദ്ര പ്രധാന്റെ രാജിയില്‍ പ്രതികരിച്ച് കേന്ദ്രമന്ത്രി അമിത് ഷാ. ബിജെപി പ്രവര്‍ത്തകര്‍ക്ക് പദവിയേക്കാള്‍ പ്രധാനം രാജ്യവും യുവാക്കളും വിദ്യാര്‍ഥികളുമാണ്. ധര്‍മേന്ദ്ര പ്രധാന്റെ രാജി ആ തത്വമാണ് തെളിയിക്കുന്നത്. മോദി സര്‍ക്കാര്‍ രാജ്യത്തെ യുവാക്കളുടെ വികാരങ്ങളെ മാനിക്കുന്നുവെന്നും കേന്ദ്രമന്ത്രി അമിത് ഷാ എക്‌സില്‍ കുറിച്ചു.

2018 മാര്‍ച്ച് 29 ന് രാഹുല്‍ ഗാന്ധി എക്‌സില്‍ പങ്കുവെച്ച കുറിപ്പ് വീണ്ടും ചര്‍ച്ചയാകുന്നു. പരീക്ഷാ ചോദ്യപേപ്പര്‍ ചോര്‍ച്ച ലക്ഷക്കണക്കിന് വിദ്യാര്‍ത്ഥികളുടെ പ്രതീക്ഷകളും ഭാവിയുമാണ് തകര്‍ക്കുന്നതെന്ന് 2018 മാര്‍ച്ച് 29ന് രാഹുല്‍ ഗാന്ധി പോസ്റ്റ് ചെയ്തിരുന്നു. എട്ടു വര്‍ഷങ്ങള്‍ക്കിപ്പുറം നീറ്റ് ക്രമക്കേടും ചോദ്യപേപ്പര്‍ ചോര്‍ച്ചയും തുടര്‍ന്നുള്ള പ്രക്ഷോഭങ്ങളും രാജ്യത്തെ ഉലയ്ക്കുമ്പോള്‍, രാഹുല്‍ അന്ന് നല്‍കിയ മുന്നറിയിപ്പ് ചര്‍ച്ച ചെയ്യുകയാണ് സോഷ്യല്‍ മീഡിയ.

പുതിയ കേന്ദ്ര വിദ്യാഭ്യാസ മന്ത്രിയായി ചുമതലയേറ്റ പ്രഹ്ലാദ് ജോഷിക്ക് മുന്നറിയിപ്പുമായി കോക്രോച്ച് ജനതാ പാര്‍ട്ടി (സിജെപി) വക്താവ് സൗരവ് ദാസ്. രാജ്യത്തെ യുവജനം എല്ലാം കാണുന്നുണ്ടെന്ന് ഓര്‍മ്മിപ്പിച്ച സൗരവ്, ഭാവിയില്‍ ചോദ്യപേപ്പര്‍ ചോര്‍ച്ച തടയുന്നതിനായി തങ്ങളുടെ അഞ്ചിന വിദ്യാഭ്യാസ പരിഷ്‌കരണ നിര്‍ദേശങ്ങള്‍ സര്‍ക്കാര്‍ നടപ്പാക്കണമെന്ന് ആവശ്യപ്പെട്ടു. അധികാരത്തിലിരിക്കുന്നവരില്‍ നിന്ന് യുവാക്കള്‍ തുടര്‍ന്നും മറുപടി ആവശ്യപ്പെടുമെന്നും സിജെപി വക്താവ് വ്യക്തമാക്കി.

 വടക്കുപടിഞ്ഞാറന്‍ ബംഗാള്‍ ഉള്‍ക്കടലിലും അതിനോട് ചേര്‍ന്നുള്ള പശ്ചിമ ബംഗാള്‍ - വടക്കന്‍ ഒഡീഷ തീരങ്ങള്‍ക്കും മുകളിലായി പുതിയൊരു ന്യൂനമര്‍ദ്ദം രൂപപ്പെട്ടു. ഇതിന്റെ സ്വാധീനഫലമായി കേരളത്തില്‍ ഈ മാസം 29 വരെ മഴയ്ക്ക് സാധ്യതയുണ്ട്. നാളെ മുതല്‍ ബുധനാഴ്ച വരെയുള്ള ദിവസങ്ങളില്‍ മഴ കൂടുതല്‍ ശക്തമാകുമെന്നും കാലാവസ്ഥ വകുപ്പ് അറിയിച്ചു. എറണാകുളം മുതല്‍ വടക്കോട്ടുള്ള ആറു ജില്ലകളില്‍ നാളെ യെല്ലോ അലർട്ടുണ്ട്.

മുടങ്ങിക്കിടന്ന ഒരു കാര്യം വീണ്ടും മുന്നോട്ടുപോകും. ഔദ്യോഗിക ആവശ്യത്തിനുള്ള സന്ദർശനം ഫലം കാണും. പുതിയ ആളുകളുമായുള്ള പരിചയം ഗുണകരമാകും. ചെലവു ചുരുക്കാൻ നോക്കുക. ജോലി സംബന്ധമായ ഒരു നിർണായക തീരുമാനം എടുക്കും. വീട്ടിലേക്ക് ആവശ്യമായ ഒരു സാധനം വാങ്ങാൻ സാധ്യതയുണ്ട്. സുഹൃത്തിന്റെ നിർദേശം പുതിയ അവസരത്തിലേക്ക് നയിക്കും.