ചെന്നൈ: തമിഴ്നാട്ടിലെ തിരുച്ചിറപ്പള്ളി വിമാനത്താവളത്തില്‍ നിന്ന് പറന്നുയര്‍ന്നതിന് തൊട്ടുപിന്നാലെ ഹൈഡ്രോളിക് തകരാര്‍ റിപ്പോര്‍ട്ട് ചെയ്ത എയര്‍ ഇന്ത്യ എക്സ്പ്രസ് വിമാനം സുരക്ഷിതമായി തിരിച്ചിറക്കി.

144 യാത്രക്കാരുമായി ഷാര്‍ജയിലേക്ക് പുറപ്പെട്ട എഎക്‌സ്ബി 613 എന്ന വിമാനം വൈകുന്നേരം 5.40 നാണ് പറന്നുയര്‍ന്നത്. ഉടന്‍ തന്നെ തകരാര്‍ റിപ്പോര്‍ട്ട് ചെയ്തു. വിമാനത്താവളത്തിന് ചുറ്റും പറന്ന് ഇന്ധനം കുറച്ചതിന് ശേഷമാണ് ലാന്‍ഡ് ചെയ്തത്.

സാങ്കേതിക തകരാര്‍, ആകാശത്ത് വടമിട്ട് പറന്ന് വിമാനം, 141 യാത്രക്കാരുടെ ജീവന്‍ ആശങ്കയില്‍

വിമാനം രണ്ടര മണിക്കൂറിലധികം നേരം ആകാശത്ത് വട്ടമിട്ട് പറന്നു. ഒടുവില്‍ രാത്രി 8.15 ന് വിമാനം തിരിച്ചിറക്കി. ലാന്‍ഡിങ് ഗിയറില്‍ പ്രശ്‌നമുണ്ടെന്ന് 7.30ഓടെയാണ് അറിഞ്ഞത്. തുടര്‍ന്ന് തിരുച്ചിറപ്പള്ളി വിമാനത്താവളത്തില്‍ അടിയന്തര ലാന്‍ഡിങിനുള്ള ഒരുക്കങ്ങളും അധികൃതര്‍ പൂര്‍ത്തിയാക്കിയിരുന്നു. 20 ആംബുലന്‍സുകളും 18 ഫയര്‍ എഞ്ചിനുകളും വിമാനത്താവളത്തില്‍ സജ്ജീകരിച്ചിരുന്നു.