വിവാദങ്ങള്‍ക്കിടെ തെരഞ്ഞെടുപ്പ് കമ്മീഷന്‍ ഇന്ന് യോഗം ചേര്‍ന്നു. വിവിധ വിഷയങ്ങളില്‍ കമ്മീഷണര്‍മാര്‍ക്കിടയില്‍ ഭിന്നതയെന്ന റിപ്പോര്‍ട്ടിലും എസ്‌ഐആര്‍ സംബന്ധിച്ച ആശയക്കുഴപ്പങ്ങളിലും വിശദമായ മറുപടി നല്‍കുന്ന വാര്‍ത്താക്കുറിപ്പ് കമ്മീഷന്‍ പുറത്തിറക്കി. ഏഷ്യന്‍ ഗെയിംസില്‍ ഇന്ത്യ മെഡല്‍ വേട്ട തുടരുന്നു. കബഡിയില്‍ പുരുഷ. വനിത ടീമുകള്‍ സ്വര്‍ണം സ്വന്തമാക്കി. ഇവയുള്‍പ്പെടെ ഇന്നത്തെ അഞ്ച് പ്രധാന വാര്‍ത്തകള്‍ ചുവടെ.

മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറും തെരഞ്ഞെടുപ്പ് കമ്മീഷണര്‍മാരായ എസ്എസ് സന്ധു, വിവേക് ജോഷി എന്നിവരും ശനിയാഴ്ച ഡല്‍ഹിയിലെ കമ്മീഷന്‍ ആസ്ഥാനത്ത് യോഗം ചേര്‍ന്നു. 3 മണിക്ക് ചേര്‍ന്ന യോഗത്തിന് ശേഷം, എസ്‌ഐആര്‍ പ്രക്രിയ, ഇസിഐനെറ്റ്, ഫോം 6, വോട്ടര്‍പട്ടികയുമായി ബന്ധപ്പെട്ട അവകാശവാദങ്ങളും ആക്ഷേപങ്ങളും, കാബിനറ്റ് സെക്രട്ടറിക്ക് നല്‍കിയ കത്തുമായി ബന്ധപ്പെട്ട വിവാദം എന്നിവ സംബന്ധിച്ച തീരുമാനങ്ങള്‍ വിശദീകരിക്കുന്ന വാര്‍ത്താക്കുറിപ്പ് കമ്മീഷന്‍ പുറത്തിറക്കി.

വനിതകള്‍ക്ക് പിന്നാലെ ഏഷ്യന്‍ ഗെയിംസ് കബഡി സ്വര്‍ണം പുരുഷന്‍മാരും നിലനിര്‍ത്തി. ഫൈനലില്‍ ത്രില്ലര്‍ പോരാട്ടത്തില്‍ ഇറാനെയാണ് ഇന്ത്യ വീഴ്ത്തിയത്. 39-35 എന്ന സ്‌കോറിനാണ് ഇന്ത്യയുടെ ജയം. നേരത്തെ വനിതകളും ഇറാനെ തന്നെയാണ് പരാജയപ്പെടുത്തിയത്. 

കേരള ഹൈക്കോടതി വളപ്പില്‍ ഫോട്ടോ എടുക്കുന്നതിനും, വിഡിയോ റെക്കോര്‍ഡിംഗിനും ലൈവ് സ്ട്രീമിംഗിനും പൂര്‍ണ നിരോധനം ഏര്‍പ്പെടുത്തി ഏര്‍പ്പെടുത്തി മാര്‍ഗനിര്‍ദേശം പുറപ്പെടുവിച്ചു. രജിസ്ട്രാര്‍ ജനറലാണ് ഉത്തരവ് പുറപ്പെടുവിച്ചത്.

കേരള സാഹിത്യ അക്കാദമി, സംഗീത നാടക അക്കാദമി ഉള്‍പ്പെടെ സാംസ്‌കാരിക വകുപ്പിനു കീഴിലെ സ്ഥാപനങ്ങള്‍ക്കു മേധാവികളെ നിയമിച്ചു. പ്രമുഖ എഴുത്തുകാരന്‍ കല്‍പ്പറ്റ നാരായണനാണ് സാഹിത്യ അക്കാദമി അധ്യക്ഷന്‍. ഗായകന്‍ ജി വേണുഗോപാല്‍ സംഗീത നാടക അക്കാദമിയുടെയും നടന്‍ പ്രേംകുമാര്‍ ചലച്ചിത്ര വികസന കോര്‍പ്പറേഷന്റേയും അധ്യക്ഷരാവും. 

സര്‍വീസില്‍ നിന്ന് വിരമിച്ച ശേഷം ബിജെപി ടിക്കറ്റില്‍ മത്സരിക്കണമെന്നും ജയിച്ചാല്‍ കേന്ദ്രമന്ത്രിയാകാമെന്നും 2016ല്‍ ഗ്യാനേഷ് കുമാര്‍ ഉപദേശിച്ചിരുന്നുവെന്ന് മുന്‍ ചീഫ് സെക്രട്ടറി ജിജി തോംസണിന്റെ വെളിപ്പെടുത്തല്‍.