ഹൈദരാബാദ്: 121 വയസ് പ്രായമുള്ള ആമയെ ദത്തെടുത്ത് ഹൈദരാബാദിലെ കുടുംബം. നെഹ്‌റു സുവോളജിക്കല്‍ പാര്‍ക്കിലെ ഗാലപാഗോസ് ഇനത്തില്‍പ്പെട്ട ആമയുടെ സംരക്ഷണമാണ് ദമ്പതികള്‍ ഏറ്റെടുത്തത്.

ശനിയാഴ്ച കുടുംബാംഗങ്ങള്‍ക്കൊപ്പം പാര്‍ക്ക് സന്ദര്‍ശിച്ചാണ് ആമയെ ദത്തെടുക്കാന്‍ തയ്യാറാണ് എന്ന കാര്യം അറിയിച്ചത്. മൃഗശാലയിലെ ഏറ്റവും പ്രായമേറിയ ജീവിയാണ് ഈ ആമ. 121 വയസാണ് പ്രായം. ആമയെ ഏറ്റെടുക്കുന്നതിന്റെ ഭാഗമായി മൃഗശാല അധികൃതര്‍ക്ക് സരോജ് ദേവിയും ഭര്‍ത്താവ് ആശിഷ് കുമാറും 30,000 രൂപയുടെ ചെക്ക് കൈമാറി. ഒരു വര്‍ഷത്തേയ്ക്കാണ് ദത്തെടുക്കല്‍. ആമയുടെ സംരക്ഷണം ഏറ്റെടുത്തതിന് മൃഗശാല അധികൃതര്‍ കുടുംബത്തോട് നന്ദി അറിയിച്ചു.