ശഹരാന്‍പുര്‍ (യുപി): റോഡില്‍ ഓവര്‍ ടേക്ക് ചെയ്തതിന് ഉത്തര്‍പ്രദേശില്‍ മാധ്യമ പ്രവര്‍ത്തകനെ അടിച്ചു കൊന്നു. സുധീര്‍ സൈനിയാണ് കൊല്ലപ്പെട്ടത്. സംഭവവുമായി ബന്ധപ്പെട്ട് രണ്ടു പേര്‍ അറസ്റ്റിലായി.

ബുധനാഴാച് വൈകിട്ടാണ് സംഭവം. ശഹരാണ്‍പുരില്‍ വച്ച് മൂന്നു പേര്‍ പോവുകയായിരുന്ന ബൈക്കിനെ സൈനി ഓവര്‍ ടേക്ക് ചെയ്തു. ഇതിനെച്ചൊല്ലി ഇരുകൂട്ടരും തമ്മില്‍ തര്‍ക്കമുണ്ടായെന്ന് പൊലീസ് പറഞ്ഞു. തര്‍ക്കത്തിനൊടുവില്‍ മൂന്നു പേരും ചേര്‍ന്ന് സൈനിയെ ആക്രമിക്കുകയായിരുന്നു.

പരിക്കേറ്റ സൈനിയെ ഉടന്‍ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. സംഭവവുമായി ബന്ധപ്പെട്ട് ജഗാംഗിര്‍, ഫര്‍മാന്‍ എന്നിവര്‍ പിടിയിലായതായി പൊലീസ് അറിയിച്ചു. മന്നന്‍ എന്ന ഒരാള്‍ ഒളിവിലാണ്. ഇയാള്‍ക്കായി തിരച്ചില്‍ തുടങ്ങിയതായി എസ്എസ്പി ആകാശ് തോമര്‍ പറഞ്ഞു.