മുംബൈ: മഹാരാഷ്ട്രയിലെ താനെ ജില്ലയില്‍ നിര്‍ത്തിയിട്ടിരുന്ന വാഹനത്തിനുള്ളില്‍ അപ്രതീക്ഷിതമായി എയര്‍ബാഗ് തുറന്നതിനെ തുടര്‍ന്ന് 25 കാരന്‍ രക്തം വാര്‍ന്ന് മരിച്ചു.

ബുധനാഴ്ച കാഷിമിര പ്രദേശത്തായിരുന്നു സംഭവം. കാര്‍ ഡീലറായ യുവാവ് 15 വര്‍ഷം പഴക്കമുള്ള കാറിനുള്ളില്‍ ഇരിക്കുമ്പോള്‍ സുരക്ഷാ സംവിധാനം (എയര്‍ബാഗ്) പെട്ടെന്ന് പ്രവര്‍ത്തിക്കുകയായിരുന്നുവെന്ന് പൊലീസ് ഉദ്യോഗസ്ഥന്‍ പറഞ്ഞു.

എയര്‍ബാഗ് പെട്ടെന്ന് തുറന്നതിന്റെ ശക്തമായ ആഘാതത്തില്‍ യുവാവിന് ഗുരുതരമായി പരിക്കേല്‍ക്കുകയും, വിദഗ്ദ്ധ വൈദ്യസഹായം ലഭിക്കുന്നതിന് മുമ്പ് തന്നെ അമിതമായി രക്തം വാര്‍ന്ന് മരണം സംഭവിക്കുകയുമായിരുന്നു.

പ്രാഥമിക അന്വേഷണങ്ങള്‍ പ്രകാരം, വാഹനം ഏറെ പഴക്കമുള്ളതാണെങ്കിലും ഔദ്യോഗിക രേഖകളില്‍ ഇതിന് ഇപ്പോഴും സാധുവായ ഫിറ്റ്‌നസ് സര്‍ട്ടിഫിക്കറ്റ് ഉണ്ടെന്ന് ഉദ്യോഗസ്ഥര്‍ പറഞ്ഞു. സംഭവത്തില്‍ പൊലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചിട്ടുണ്ട്.