ലക്‌നൗ: ഉത്തര്‍പ്രദേശിലെ വിമാനത്താവളത്തില്‍ ഒരേ ചിത്രമുള്ള രണ്ടു ആധാര്‍ കാര്‍ഡുമായി യാത്രക്കാരന്‍ പിടിയില്‍.  ചിത്രങ്ങള്‍ ഒന്നു തന്നെയാണെങ്കിലും പേരുകള്‍ വ്യത്യസ്തമാണ്. യാത്രക്കാരനെ തിരിച്ചറിഞ്ഞിട്ടില്ല.

ബറേലി വിമാനത്താവളത്തിലാണ് സംഭവം. മുംബൈയ്ക്ക് പുറപ്പെടുന്ന വിമാനത്തില്‍ കയറാനാണ് യാത്രക്കാരന്‍ വിമാനത്താവളത്തില്‍ എത്തിയത്. കൈവശം ഇ- ബോര്‍ഡിങ് പാസ് ഉണ്ടായിരുന്ന യാത്രക്കാരന്റെ നീക്കത്തില്‍ സംശയം തോന്നിയ എയര്‍പോര്‍ട്ട് ഉദ്യോഗസ്ഥര്‍ പരിശോധിക്കുകയായിരുന്നു. തിരിച്ചറിയല്‍ രേഖ ചോദിച്ചപ്പോള്‍ നല്‍കിയ ആധാര്‍ കാര്‍ഡില്‍ വിവരങ്ങള്‍ അവ്യക്തമായിരുന്നു. 

മൊബൈലില്‍ കാണിച്ച പാന്‍ കാര്‍ഡിന്റെ ഡിജിറ്റല്‍ പകര്‍പ്പിലും വിവരങ്ങള്‍ അവ്യക്തമായിരുന്നതായി എയര്‍പോര്‍ട്ട് ഉദ്യോഗസ്ഥര്‍ പറയുന്നു. തുടര്‍ന്ന് മൊബൈല്‍ ഫോണ്‍ പരിശോധിച്ചപ്പോഴാണ് മറ്റൊരു ആധാര്‍ കാര്‍ഡിന്റെ പകര്‍പ്പ് കണ്ടെത്തിയത്. രണ്ട് ആധാര്‍ കാര്‍ഡിന്റെയും ഫോട്ടോകള്‍ ഒന്നു തന്നെയാണെങ്കിലും പേരും മേല്‍വിലാസവും വ്യത്യസ്തമായിരുന്നു.കൂടുതല്‍ ചോദ്യം ചെയ്യാന്‍ കസ്റ്റഡിയിലെടുത്ത യാത്രക്കാരനെ പൊലീസ് സ്റ്റേഷനിലേക്ക് കൊണ്ടുപോയി. വ്യാജ രേഖകള്‍ ചമച്ചത് അടക്കമുള്ള വകുപ്പുകള്‍ ചേര്‍ത്ത് യാത്രക്കാരനെതിരെ കേസെടുത്തതായി പൊലീസ് അറിയിച്ചു.