ചെറിയ കാര്യം പോലും റീല്‍ ആക്കുന്നത് ഇന്ന് ഒരു പതിവ് പരിപാടിയായി മാറിയിട്ടുണ്ട്. ചിലര്‍ റീല്‍ ട്രെന്‍ഡിങ് ആകാന്‍ അതിസാഹസികതയ്ക്ക് വരെ മുതിര്‍ന്ന് അപകടത്തില്‍പ്പെട്ട നിരവധി സംഭവങ്ങള്‍ ഉണ്ടായിട്ടുണ്ട്. ഇപ്പോള്‍ അത്തരത്തില്‍ അതിസാഹസികതയ്ക്ക് മുതിര്‍ന്ന യുവാവ് ഒരു സൈക്കിള്‍ യാത്രക്കാരനെ ഇടിച്ചിട്ട സംഭവത്തിന്റെ ദൃശ്യങ്ങളാണ് വൈറലാകുന്നത്.
ഡല്‍ഹി സിഗ്നേച്ചര്‍ പാലത്തിലാണ് സംഭവം.അതിവേഗത്തില്‍ പായുകയാണ് ഓട്ടോറിക്ഷ. ഓട്ടോറിക്ഷയുടെ കമ്പിയില്‍ പിടിച്ച് വാഹനത്തിന്റെ പുറത്ത് നിന്ന് അഭ്യാസപ്രകടനം നടത്തുകയാണ് യുവാവ്. യുവാവിന്റെ അഭ്യാസപ്രകടനം തൊട്ടുപിന്നില്‍ ബൈക്കില്‍ വരുന്ന കൂട്ടുകാര്‍ ക്യാമറയില്‍ പകര്‍ത്തുന്നതും വീഡിയോയില്‍ കാണാം.
അതിനിടെ റോഡരികിലൂടെ പോകുകയായിരുന്ന സൈക്കിള്‍ യാത്രക്കാരനെയാണ് യുവാവ് ഇടിച്ചിട്ടത്. വാഹനത്തിന്റെ പുറത്ത് നിന്ന് അഭ്യാസപ്രകടനം നടത്തുന്നതിനിടെ, സൈക്കിള്‍ യാത്രക്കാരന്റെ മേല്‍ യുവാവ് ഇടിക്കുകയായിരുന്നു. ഇടിയുടെ ആഘാതത്തില്‍ സൈക്കിള്‍ യാത്രക്കാരന് നിലത്തുവീണ് പരിക്കേറ്റു.
സംഭവത്തില്‍ ഓട്ടോറിക്ഷ തിരിച്ചറിഞ്ഞ ട്രാഫിക് ഉദ്യോഗസ്ഥര്‍ ഡ്രൈവര്‍ക്ക് പിഴയിട്ടു. അപകടകരമായ രീതിയില്‍ ഓട്ടോ ഓടിച്ചത് അടക്കമുള്ള വകുപ്പുകള്‍ ചുമത്തിയാണ് നടപടി സ്വീകരിച്ചത്. ഡ്രൈവിങ് ലൈസന്‍സ് ഇല്ലാതെയാണ് വാഹനം ഓടിച്ചത് എന്നും കണ്ടെത്തി. ഗതാഗത നിയമലംഘനം ചൂണ്ടിക്കാട്ടി ഇതിനെതിരെയും നടപടി സ്വീകരിച്ചിട്ടുണ്ട്. അപകടത്തിന് കാരണമായ ഓട്ടോ ട്രാഫിക് അധികൃതര്‍ കസ്റ്റഡിയിലെടുത്തിട്ടുണ്ട്.
ഈ വാർത്ത കൂടി വായിക്കൂ
സമകാലിക മലയാളം ഇപ്പോൾ വാട്‌സ്ആപ്പിലും ലഭ്യമാണ്. ഏറ്റവും പുതിയ വാർത്തകൾക്കായി ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates